Þörf á róttækum aðgerðum í Landmannalaugum

Í rammaskipulagi fyrir hálendið norðan Mýrdalsjökuls er gert ráð fyrir að tjaldsvæði og gistiskálar færist út fyrir hjarta Landmannalauga. Skiptar skoðanir eru um færsluna en talsmenn hennar segja skipulagsleysi hafa ríkt á svæðinu og að nú sé þörf á róttækum aðgerðum.

Samkeppni um deiliskipulag Landmannalalaugasvæðisins er í burðarliðnum og hefur Rangárþing ytra tvisvar fengið styrk úr framkvæmdasjóði ferðamannastaða vegna hennar, samtals þrettán milljónir. Gengið er út frá að meginþjónusta verði færð og að á núverandi þjónustusvæði verði aðeins gestastofa og búningsaðstaða fyrir náttúrulaug.

Ef hugmyndir um færslu þjónustunnar frá Landmannalaugum verða að veruleika þarf að búa til einhvers konar landfyllingu þar sem svæðið er blautt og í meðfylgjandi myndskeiði má sjá svæðið sem um ræðir.

Hefurðu einhverja tilfinningu fyrir því hvort fólk er almennt hlynnt þessu eða andvígt?

„Ég held það séu bara mjög skiptar skoðanir um það,“ segir Ingibjörg Eiríksdóttir, svæðalandvörður Umhverfisstofnunar á Suðurlandi.

Talsmenn færslunnar segja margar ástæður fyrir henni.

„ Fyrst og fremst það að við viljum endurheimta Landmannalaugar sem líkast því sem þær voru og þá á ég við friðsældina og fegurðina. Við viljum að þarna sé sem minnst af öðru en því sem náttúrulegt er,“ segir Kristinn Guðnason, sem situr í nefnd um framtíðarskipulag Landmannalauga.

Kristinn segir skipulagsleysi hafa ríkt í Landmannalaugum og að þar séu til að mynda aðeins tvö hús á samþykktum lóðum.

„Þetta er orðið dálítið draslaralegt. Það eru tjöld úti um allt og það sem heilsar fólki á fallegasta stað Íslands eru fataleppar á einhverjum grindum, við laugina á staðnum. Þetta þarf að laga og það getum við.“

Kristinn segir nauðsynlegt að grípa til róttækra aðgerða en ljóst er að kostnaður við færslu þjónustunnar yrði gríðarlegur. Hann segir tal um gróða af ferðaþjónustu marklaust ef ekki megi leggja fjármagn í staði eins og Landmannalaugar.

En væri ekki skynsamlegra að byggja upp það sem þegar er á staðnum?

„Ja, þá værum við bara að gera þveröfugt við það sem við viljum,“ segir Kristinn.