Þingmaður misskildi úrslit kosninganna

„Frambjóðendurnir raðast nánast eftir stafrófsröð sem segir það kannski að þeir sem eru aftarlega í stafrófinu hafa lítinn sjens í persónukjöri," sagði Vigdís Hauksdóttir, þingmaður Framsóknarflokksins, skömmu eftir að frumúrslit kosninga til stjórnlagaþings voru kynnt í gær.

Þorgeir Ástvaldsson og Kristófer Helgason ræddu við Vigdísi í þættinum Reykjavík síðdegis á Bylgjunni þar sem þeir leituðu viðbragða ýmissa aðila við úrslitum kosninganna.

„Þeir sem fá flestu atkvæðin eru fremstir í stafrófinu og svo niður úr. Það er svolítið merkilegt út af því að listinn raðaðist þannig að hann byrjaði á A og fór svo niðureftir þannig að hefði kannski listinn byrjað á L þá hefðu kannski úrslitin líka orðið öðruvísi. Hugsið ykkur það," sagði Vigdís.

Þorgeir sagði þetta athyglisverðan punkt hjá þingmanninum og hafði samband við næsta viðmælanda, stjórnmálafræðinginn Einar Mar Þórðarson.

Einar Mar tók af allan vafa um að Vigdís hafði þarna misskilið úrslitin en þegar niðurstöður voru kynntar var tekið sérstaklega fram að nöfn nýkjörinna þingmanna á stjórnlagaþing yrðu lesin upp í stafrófsröð en ekki eftir atkvæðamagni. Upplýst yrði um það síðar hver fékk flest atkvæði. Eins og kom þá í ljós fékk Þorvaldur Gylfason hagfræðingur flest atkvæði, en hann er einn þeirra frambjóðenda sem er hvað aftast í stafrófsröðinni. Um það var tilkynnt eftir viðtalið við Vigdísi.

Ekki náðist í Vigdísi við vinnslu fréttarinnar.

Hlusta má á upptöku af Reykjavík síðdegis í gær með því að smella á tengilinn hér fyrir ofan.



Uppfært klukkan 10.26:

Vigdís segir í samtali við Vísi að henni finnist afar undarlegt að úrslitin hafi upphaflega verið kynnt þannig að nöfn kjörinna fulltrúa voru lesin upp í stafrófsröð en ekki eftir því hversu mörg atkvæði voru á bak við kjör hvers þeirra.

Hún bendir á að Ástráður Haraldsson, formaður landskjörstjórnar, hafi sagt, áður en hann hóf að lesa upp nöfnin, að þau yrðu lesin upp í samræmi við tiltekna lagagrein. Taldi Vigdís að Ástráður væri þar að vísa til þess að nöfnin yrðu lesin upp eftir atkvæðamagni. Henni finnst upphafleg framsetning á úrslitinum afar villandi.