Viðskipti innlent

Þessir vegir lenda í tíu milljarða niðurskurði samgönguáætlunar

Kristján Már Unnarsson skrifar
Ríkisstjórnin er langt komin með að skera samgönguáætlun niður um tíu milljarða króna. Vegur um Teigsskóg, Dettifossvegur, hringvegurinn í Berufirði og ný brú á Hornafjarðarfljót eru meðal verkefna sem lenda undir hnífnum. Fjallað var um niðurskurðinn í frétt Stöðvar 2, sem sjá má hér að ofan. 

Samgönguáætlun sem Alþingi samþykkti þann 12. október, rétt fyrir þingkosningar, var tveimur mánuðum síðar orðin marklaus, með samþykkt fjárlaga. Jón Gunnarsson, ráðherra samgöngumála, segir að það muni tæpum tíu milljörðum króna. Þurft hefði 14 milljarða en um 4,5 milljarðar hefðu komið í fjárlagafrumvarpi til nýrra framkvæmda.

Niðurskurðurinn verður mestur á Vestfjörðum. 1200 milljónir króna voru markaðar í Vestfjarðaveg um Gufudalssveit í ár en öll sú fjárhæð verður skorin af. 400 milljónir áttu að fara í Dynjandisheiði, það allt sömuleiðis verður tekið af í ár. 

Næstmesti niðurskurðurinn verður á sunnanverðum Austfjörðum. Einn milljarður átti að fara í nýja brú á Hornafjarðarfljót. Það verða núll krónur eftir niðurskurð. 

400 milljónir voru markaðar til að klára hringveginn um Berufjarðarbotn. Þar verður heldur ekkert gert.

„Það er eitt af þeim verkefnum sem við urðum því miður að fresta. Þetta eru mikil vonbrigði víða um land, því miður,“ segir Jón. 

Samgönguráðherra setti Krýsuvíkurgatnamótin í Hafnarfirði í forgang en annars segir hann stærstu fjárhæðir fara í nýja Vestmannaeyjaferju og Dýrafjarðargöng. 

Dettifossvegur átti að fá 800 milljónir króna á þessu ári. Ráðherrann segir þá tölu fara niður í 320 milljónir.

„Það er umtalsvert minna en áætlað var.“ 

Uxahryggjavegur til að tengja Borgarfjörð og Suðurland um Þingvelli, einnig Kjósarskarðsvegur, áttu að fá 300 milljónir hvor í ár, samkvæmt samgönguáætlun. Báðir verða skornir niður í núll. 

„Við höfðum ekki fjármagn til að fara í frekari framkvæmdir á því svæði núna,“ segir Jón Gunnarsson. 

Af dreifbýlisvegum norðaustanlands lentu boðaðar vegabætur í Bárðardal og til Borgarfjarðar eystri undir hnífnum og verða engar.

Sunnanlands fær Reykjavegur í Biskupstungum byrjunarframlag og segir ráðherrann að það verk fari í gang á þessu ári. 

Á Reykjavíkursvæðinu er áformað að skera 300 milljónir af breikkun Suðurlandsvegar milli Vesturlandsvegar og Rauðavatns og 350 milljónir af gatnamótum Hafnarfjarðarvegar og Vífilsstaðavegar í Garðabæ. 

800 milljóna framlag til að fækka einbreiðum brúm verður væntanlega skorið niður í 200 milljónir króna. Þá verður 1.500 milljóna framlag til að leggja slitlag á umferðarmikla tengivegi  líklega skorið niður í 850 milljónir. 

Ráðherrann viðurkennir að fyrirheit samgönguáætlunar eru ekki efnd. 

„Ekki við þessa fjárlagagerð. En ég er auðvitað að gera mér vonir um að það verði efnt það fyrirheit, sem stendur í stjórnarsáttmálanum, um að það muni koma mjög aukið fjármagn í innviðauppbyggingu. Og samgöngukerfið er klárlega einn af stærstu þáttunum þar.“ 

Hér að neðan má sjá umfjöllun Jóhanns K. Jóhannssonar um hugmyndir samgönguráðherra um nýja skatta í formi vegtolla.


Tengdar fréttir

Dofri bauð lægst í Dýrafjarðargöng

Tékkneski verktakinn Metrostav og Suðurverk buðu lægst í Dýrafjarðargöng. Dofri Eysteinsson, forstjóri Suðurverks, vonast til að hefjast handa síðsumars.

Þessi vegur fær forgang hjá nýjum vegamálaráðherra

Jón Gunnarsson, nýr ráðherra vegamála, boðar að farið verði strax í gerð mislægra gatnamóta við Krýsuvíkurveg í Hafnarfirði sem fyrsta áfanga í að ljúka tvöföldun Reykjanesbrautar.

Meira malbikað frá Mývatni á Kópasker

Framkvæmdir við Dettifossveg, Kjósarskarðsveg og Uxahryggjaveg verða boðnar út á næstu vikum vegna 1.800 milljóna króna innspýtingar sem ríkisstjórnin samþykkti í dag.






Fleiri fréttir

Sjá meira


×