Tálbeitan tældi

Gríðarleg eftirspurn er eftir vændi hér á landi. Um hundrað manns svöruðu einkamálaauglýsingu sem fréttastofa setti á einkamál.is á tæpum sólarhring og vildu kaupa vændi af nítján ára gamalli stúlku. Tveir menn mæltu sér mót við tálbeitu fréttastofu. Það á að loka þeim síðum sem hýsa auglýsingar um vændi, segir stjórnarkona í Stígamótum.

Á Íslandi er ekki ólöglegt að stunda vændi. Það er hinsvegar ólöglegt að hagnast á því, kaupa það og auglýsa. Fréttastofa útbjó prófíl á einkamálum.is fyrir tæpum sólarhring. Notast var við nafnið draumadis19 með vísan í aldur stúlkunnar. Hún sagðist bjóða upp á erótískt heilnudd gegn gjaldi. Hægt væri þó að semja um verð og ýmislegt fleira.

Viðbrögðin létu ekki á sér standa, fyrirspurnir og tilboð um kaup á þjónustu hennar með svokölluðum - happy ending - bókstaflega flæddu inn. Óskir mannanna um kynlífsleiki og athafnir voru svo grófar að ekki er unnt að birta þær. Klukkan fjögur í dag höfðu 95 karlmenn og tvær konur sett sig í samband við Draumadís og óskað eftir að kaupa blíðu hennar. Rúmlega 1200 manns höfðu skoðað auglýsinguna.

Fréttastofa mælti sér mót við fimm menn í dag. Tveir karlmenn mættu á staðinn, einn á fimmtugsaldri og einn á áttræðisaldri. Fyrir það hafði verið prúttað um verð fyrir kynmök og var verðbilið frá 10.000 krónum upp í 35.000 krónur.

Margrét Steinarsdóttir, stjórnarkona í Stígamótum, segist vita mörg dæmi þess að vændi sé auglýst með þessum hætti. „Þetta er mjög algeng leið til að selja vændi og ekki síður hér heldur en annarsstaðar."

Margrét segir að loka eigi síðum sem þessum. „Í mínum huga er þetta ólöglegt. Það hlýtur að vera einhver ábyrgð á þeim sem á netþjón að tryggja það að þarna fari ekki fram ólöglegt athæfi."

Rúmu hálfu ári eftir að lög voru samþykkt sem banna kaup á vændi hefur enginn verið ákærður. Margrét segir eftirfylgni hafa vantað.

„Við erum með lög núna sem banna kaup á kynlífsþjónustu og við verðum að gera fólki grein fyrir því það er að fremja lögbrot ef það fylgir svona auglýsingum eftir," segir Margrét.

Frá Einkamálum fengust þær upplýsingar að takmarkað eftirlit sé með síðunni um helgar. Þeir eigi þó gott samstarf við lögregluna og loki síðum þar sem grunur leikur á að verið sé að auglýsa vændi. Nú rétt fyrir fréttir hafði auglýsingin verið fjarlægð.