Stuðningsmenn Gillz snúast til varna

Aðdáendur Egils „Gillzeneggers" Einarssonar, hafa brugðist ókvæða við mótmælaöldu sem hefur riðið yfir Facebook, vegna meintrar kvenfyrirlitningar einkaþjálfarans landsfræga. Ástæðan er samstarf hans við fyrirtækið Já um ritun símaskráarinnar.

Þegar hafa á sjötta hundrað manns skráð sig á Facebook-síðu honum til stuðnings. Hópurinn styður Egil til þess að rita símaskránna.

Hópur einstaklinga hafa mótmælt aðkomu Egils að símaskránni vegna ummæla sem hann hefur látið falla á heimasíðu sinni um konur og feminista.

Bloggfærslan sem um ræðir var skrifuð árið 2007 og var tekin út eftir að Ríkissjónvarpið fjallaði um hana. Þar var meðal annars farið ófögrum orðum um fyrrverandi þingmanninn, Steinunni Valdísi Óskarsdóttur.

Í færslunni stóð meðal annars: "Steinunn Valdís Óskarsdóttir, alþingismaður. Steinunn er portkonan sem vildi breyta orðinu ráðherra í ráðfrú fyrir konur. Steinunn þarf lim og það strax. Á hana Steinunni Valdísi dugar ekkert annað en lágmark tveir harðir og munu Buka og Yao taka þetta verkefni að sér."

Í viðtali við Vísi í gær sagði Egill að sér væri gróflega misboðið vegna ummæla um að hann væri að hvetja til nauðgana. Hann sagðist ekki haldinn kvenfyrirlitningu, þvert á móti; hann elskaði konur.

Athygli vekur að andstæðingar Egils eru á fimmta hundrað. Þeir sem styðja Egil telja þegar á sjötta hundrað.