Skoða viðurlög við barngervingu í klámi

Refsiréttarnefnd hefur verið falið að skoða mögulegar breytingar á lögum um bann við vörslu og dreifingu á barnaklámi. Í því felst meðal annars að athuga hvort og þá hvernig unnt væri að heimfæra undir refsiákvæðið tilvik þar sem fullorðinn einstaklingur er barngerður í kynferðislegum tilgangi en slík lagaákvæði er meðal annars að finna í norsku hegningarlögunum. Sala og dreifing kláms er ólögleg á Íslandi en harðari viðurlög eru við dreifingu barnakláms.

Dómsmála- og mannréttindaráðuneytið hefur falið refsiréttarnefnd að útbúa frumvarp til laga um breytingu á almennum hegningarlögum svo að hægt sé að fullgilda samning Evrópuráðsins um varnir gegn kynferðislegri misneytingu og kynferðislegri misnotkun á börnum. Þá er nefndin beðin að taka til sérstakrar skoðunar hvort ástæða sé til að endurskoða refsiramma almennra hegningarlaga er snúa að kynferðisbrotum gegn börnum en samkvæmt núgildandi ákvæðum gætir nokkurs misræmis að því er varðar þær refsingar sem við þessum brotum liggja. Þannig liggur þyngri refsing við nauðgun en sambærilegu broti gegn barni.

Ráðuneytið hefur einnig óskað eftir umsögn refsiréttarnefndar um það hvort ástæða sé til að endurskoða refsirammann í mansalsmálum. Athygli ráðuneytisins hefur verið vakin á því að hugsanlega þurfi að yfirfara ákvæðið, m.a. vegna þess að mismunur er á refsingu fyrir mansal annars vegar og nauðgun eða frelsissviptingu hins vegar, en slík brot eru oft liður í mansalsbroti. Þá virðist refsirammi ákvæðisins geta gert rannsókn lögreglu í slíkum málum erfiðari en ella en sum rannsóknarúrræði laga um meðferð sakamála miða við að refsing fyrir tiltekið brot sé að minnsta kosti 10 ára fangelsisvist.