Skoða heiminn og gefa af sér

Á næstu vikum munu hópar ungra Íslendinga hverfa til ólíkra svæða í Evrópu, þar sem þeir munu taka þátt í samfélagsverkefnum á vegum sjálfboðaliðasamtakanna Seeds.

Samtökin urðu til árið 2005 og höfðu það að aðalmarkmiði að taka á móti erlendum sjálfboðaliðum sem komu til Íslands og unnu ólík störf. Þetta er enn kjarnastarfsemi þeirra, en að undanförnu hefur það færst verulega í vöxt að íslenskir sjálfboðaliðar bjóði sig fram til verkefna erlendis.

„Við erum með margar ólíkar tegundir af verkefnum í gangi, fyrir fólk á öllum aldri og víðs vegar um heim. En ungmennaskipti innan Evrópu, sem eru styrkt af Evrópusambandinu í gegnum verkefnið "Youth in action", hafa notið mikilla vinsælda," útskýrir Oscar Uscategui hjá Seeds.

„Þetta eru verkefni fyrir fólk á aldrinum átján til þrjátíu ára. Þátttakendur fá styrk sem stendur yfirleitt undir sjötíu til hundrað prósentum af ferðakostnaði þeirra, svo þetta er góður valkostur fyrir þá sem vilja ferðast en hafa ekki mikil fjárráð." Á staðnum fá sjálfboðaliðar jafnframt fæði og húsnæði gegn vinnuframlagi sínu.

Unnur Silfá Eyfells starfar við hlið Óskars hjá Seeds, en hún hefur sjálf farið til Póllands sem sjálfboðaliði þar sem hún vann við dýraverndunarverkefni og tók þátt í fjáröflun fyrir dýraathvarf. „Ég lærði mjög mikið af þessu og sá heiminn í nýju ljósi. Satt að segja leið mér aldrei eins og ég væri að vinna, því þetta var svo skemmtilegt. Á kvöldin og í frístund um kynntum við lönd okkar og menningu fyrir hvert öðru. Þetta var mjög gefandi."

Verkefnin sem nú standa til boða eru af margvíslegum toga. Í verkefninu "We are brothers, we are the future", í Palermo á Ítalíu munu þátttakendur búa til myndbönd og annað kynningarefni um réttindi ungs fólks í Evrópu. Í Valga-héraði í Eistlandi eru í boði verkefni sem snúa að dýravernd. Í Banská ?tiavnica í Slóvakíu verður þema verkefnisins "Change 4 Life", en þar er í forgrunni heilbrigður lífsstíll og hvernig hugur, líkami og umhverfi tvinnast saman í daglegu lífi.

Að lokum má nefna leiklistarverkefnið "To be or not to be", en þátttakendur í því safnast saman í bænum Gießübel í Þýskalandi. Þar verður lögð áhersla á að skoða hvernig megi nota leiklist til að brúa bil á milli menningarheima.

Hægt er að sækja um og fræðast frekar um verkefnin sem í boði eru á vefsíðunni seeds.is.