Sjúklingar með lifrarbólgu C fá lyfjameðferð sem læknað getur sjúkdóminn

Einstaklingum sem smitaðir eru af lifrarbólgu C og njóta sjúkratrygginga á Íslandi mun bjóðast meðferð með nýjum lyfjum sem geta læknað sjúkdóminn í allt að 95 til 100 prósent tilvika. Þetta var tilkynnt á blaðamannafundi á Landspítalanum nú klukkan 10.

Hingað til hafa lyfin Interferon og Ribavirin verið notuð vegna lifrarbólgu hér á landi en þau eru talin úrelt í nágrannalöndum okkar. Ríkið hefur hingað til synjað sjúklingum um nýja lyfið og hefur borið fyrir sig fjárskorti en lyfjameðferðin kostar á bilinu 7-10 milljónir króna.

Fanney Björk Ásbjörnsdóttir, sem smitaðist af lifrarbólgu C við blóðgjöf eftir barnsburð árið 1983, stefndi íslenska ríkinu þar sem það hafði neitað henni um lyfið. Hún tapaði málinu hins vegar í Héraðsdómi Reykjavíkur en nú er útlit fyrir að hún, sem og aðrir sjúklingar, fái meðferð með nýja lyfinu. Þá áfrýjaði Fanney jafnframt dómi héraðsdóms til Hæstaréttar svo sá dómur er ekki endanlegur.

Reyna að útrýma lifrarbólgu C á Íslandi

Áætlað er að um 800-1000 manns séu smitaðir af lifrarbólgu C hér á landi en árlega greinast á milli 40-70 einstaklingar.

Um meðferðarátak er að ræða sem heilbrigðisyfirvöld fara í ásamt lyfjafyrirtækinu Gilead og verður reynt að útrýma lifrarbólgu C hér á landi með átakinu auk þess sem stemma á stigu við frekari útbreiðslu hans. Samkomulag um samstarfsverkefni yfirvalda og Gilead var samþykkt á ríkissjórnarfundi í gær.

Öllum þeim sem greinst hafa með veiruna verður boðin fræðsla, meðferð og eftirfylgni. Þannig verður hættan lágmörkuð á nýjum tilvikum sjúkdómsins með smiti milli manna.

„Á Íslandi eru kjöraðstæður til að ráðast í slíkt verkefni; samfélagið er lítið, þekking og reynsla heilbrigðisstarfsmanna er fyrir hendi svo og nauðsynlegir innviðir heilbrigðiskerfis. Íslensk heilbrigðisyfirvöld vinna að þessu átaki í samstarfi við lyfjafyrirtækið Gilead sem m.a. leggur til lyfið Harvoni í faraldsfræðilegu rannsóknarskyni. Samhliða meðferðarátakinu fara fram rannsóknir á árangri átaksins til lengri og skemmri tíma, m.a. sjúkdómsbyrði og áhrifum átaksins á langtímakostnað við heilbrigðisþjónustu,“ segir í tilkynningu.

Lyfin meðal annars notuð á Norðurlöndum og í Bretlandi

Hópur lækna á Landspítala hefur haft forystu um innleiðingu verkefnisins og hefur í umboði heilbrigðisráðherra unnið að undirbúningi samnings við lyfjafyrirtækið. Þá hefur jafnframt breiður hópur fagfólks unnið að fjölþættum undirbúningi átaksins.

„Lyfin sem notuð verða í þessu verkefni hafa þegar fengið markaðsleyfi og eru notuð í mörgum löndum, m.a. á Norðurlöndum og í Bretlandi í völdum tilvikum til meðferðar sjúklinga með lifrarbólgu. Lyfin eru í töfluformi og gefin daglega meðan á meðferð stendur, alla jafna í átta til tólf vikur, þótt sumir sjúklingar geti þurft meðferð í allt að 24 vikur.

Stefnt er að því að hefja átakið fyrir lok þessa árs. Sjúklingum verður forgangsraðað til meðferðar af viðkomandi sérfræðilæknum Landspítala. Átakið mun vara í 3 ár og hefur ríkisstjórnin samþykkt að leggja til þess 150 milljónir króna á ári sem varið verður til blóðrannsókna og annarrar þjónustu sem tengist meðferðinni,“ segir jafnframt í tilkynningu Landspítalans.