Sjáðu krúttlegasta augnablik mótmælanna til þessa

Boðað var til mótmæla gegn sitjandi ríkisstjórn á Austurvelli í kvöld, fimmta daginn í röð. Rúmlega tvö þúsund manns boðuðu komu sína á Facebook.

Mótmælin hafa farið nokkuð friðsællega fram alla þessa viku og ekki komið til átaka milli lögreglu og mótmælenda. Ef marka má meðfylgjandi myndskeið, sem deilt var á Twitter á meðan mótmælum stóð, er meira að segja nokkuð gott samband á milli hópanna.

Í myndskeiðinu, sem vakið hefur nokkra lukku á Twitter, sést einn þeirra lögreglumanna sem stendur vaktina rétta ungum dreng orígamí-fugl sem hann virðist hafa dundað sér að við að brjóta saman.



Í samtali við Vísi fyrr í vikunni sagðist sálfræðingurinn Kolbrún Baldursdóttir telja að betra væri fyrir foreldra að halda börnum utan við mótmælaaðgerðir sínar.

Í þessu tilfelli virðist þó sem ekki hafi sakað að leyfa barninu að koma með, enda segir í Twitter-færslunni að hinn ungi Liljar Þór sé hæstánægður með gjöfina.

Takk kæri lögregluþjónn. Liljar Þór er hæst ánægður með origami fuglinn sinn. @logreglan #cashljós pic.twitter.com/CdeBJG2Huk

— vaselín (@_elinasbjarnar) April 8, 2016