Siggi Raggi um vaxtakjör bankanna: „Þetta láta Íslendingar bjóða sér kynslóð eftir kynslóð“

„Var að fá bréf frá bankanum mínum í Noregi sem ákvað að lækka vextina á húsnæðisláninu mínu í þriðja skipti síðan í apríl, að þessu sinni niður í 2.15% óverðtryggða breytilega vexti,“ segir Sigurður Ragnar Eyjólfsson, fyrrum þjálfari kvennalandsliðsins í knattspyrnu og núverandi aðstoðarþjálfari Rúnars Kristinssonar hjá Lillestrøm í Noregi, í stöðufærslu sem hann deilir á Facebook.

Siggi Raggi, eins og hann er jafnan kallaður, bendir á að sambærilegt húsnæðislán hjá Landsbankanum sé á sjö prósent vöxtum.

Miðað við þær forsendur reiknast honum til að mánaðarleg afborgun af tuttugu milljón króna húsnæðisláni sé 141.476 krónur á Íslandi en 87.603 krónur í Noregi.

„Munar sem sagt 53.873 kr á mánuði á afborguninni. En í Noregi myndirðu reyndar fá 9.850 kr endurgreiddar frá skattinum (27% af vaxtagreiðslum ársins eru endurgreiddar til fólks í Noregi) svo í raun munar um 63.000 krónum á mánuði á mánaðarlegri afborgun eða um 756.000 krónum á ári eða 18,9 milljónum á þessum 25 árum,“ segir hann.

Sjá einnig: „Er þetta banki eða er þetta glæpafélag?“

Siggi Raggi segir þetta einfaldlega kostnað Íslendinga af því að vera með íslenska krónu og bætir við að íslenskir pólitíkusar séu hræddir við að breyta kerfinu, þeir vilji ekki rugga bátnum. „Þetta finnst flestum stjórnmálamönnunum heima allt í lagi.“

Knattspyrnuþjálfarinn bætir svo við: „Þetta láta Íslendingar bjóða sér kynslóð eftir kynslóð og kjósa þá aftur og aftur. Bæta bara á sig aukavinnu.“

Sjá einnig: Hvað er bankinn þinn að rukka þig um mikið og fyrir hvað?

Því sé ekki að undra að helmingur Íslendinga eigi minna en 750.000 krónur í hreinni eign. „Við erum að borga húsnæðisskuldir allt lífið líkt og foreldrar okkar. Bankarnir moka svo upp tugum ef ekki hundruðum milljarða í hagnað á hverju ári. Þetta er algjör bilun,“ segir hann að lokum.

Var að fá bréf frá bankanum mínum í Noregi sem ákvað að lækka vextina á húsnæðisláninu mínu í þriðja skipti síðan í aprí...

Posted by Sigurður Ragnar Eyjólfsson on Sunday, October 4, 2015