Innlent

Segja tónlistarnámið í uppnámi

Fimmtán ára drengur, sem hefur verið í píanónámi á Ísafirði í níu ár, þarf að flytja til Reykjavíkur til að leggja stund á framhaldsnám, verði hugmyndir Illuga Gunnarssonar menntamálaráðherra um breytingar á skipulagi tónlistarnáms að veruleika. Foreldrar hans hafa áhyggjur af stöðunni. 

Illugi viðraði á dögunum róttækar breytingar á fjármögnun og skipulagi tónlistarnáms á framhaldsstigi. Þannig myndi allt fjármagn ríkisins sem ætlað er til framhaldsnáms í tónlist verða veitt einum tónlistarskóla í Reykjavík.

Málið er enn á upphafsreit og engin ákvörðun hefur verið tekin um breytingarnar. Ljóst er þó að ef af verður hefði það vítæk áhrif á þá tæplega 190 nemendur sem stunda tónlistarnám á framhaldstigi á landsbyggðinni.  Þar á meðal er Pétur Ernir, fimmtán ára drengur sem hefur verið í píanónámi á Ísafirði frá sex ára aldri. 

„Maður verður bara að flytjast til Reykjavíkur. Ekki það að það sé eitthvað þar sem maður vilji gera en það hljómar eins og það eina í stöðunni,“ segir Pétur Ernir. Hildur Pétursdóttir móðir hans tekur í sama streng.

„Ef hann getur ekki stundað sitt píanónám hérna á Ísafirði, þá þýðir það að hann þarf að flytja til Reykjavíkur. Þetta er stór hluti af hans framtíðaráformum þannig að það er ekkert annað í boði en að senda hann í burtu fimmtán ára gamlan,
“ segir hún.

„Er það markmið hjá þessari ríkisstjórn að færa allt til Reykjavíkur? Þessi tillaga byggir á því að öll sveitarfélög á landinu þurfi að sjá um framhaldsnám í tónlist nema Reykjavík. Þau ætla að styrkja Reykjavík um tugi milljóna til að halda úti þessari kennslu en önnur sveitarfélög fá ekki neitt. Þetta er bara hluti af byggðarstefnunni. Þetta er hluti líka af jafnrétti til náms,“ bætir hún við. 

Fjölskyldan hefur þungar áhyggjur af stöðunni. 

„Þó að Illugi segi að þetta muni ekki breyta framhaldsnáminu sem slíku þá hef ég bara enga trú á því. Ríkið kom inn í þessa kennslu með framlagi til þess að halda þessu gangandi. Ef það á að taka þetta framlag í burtu og færa það á einn stað sé ég ekki að tónlistarskólar á landinu geti staðið undir framhaldsnámi einir og sér. Þetta hefur mikið að segja fyrir okkur,“ segir Svavar Guðmundsson faðir Péturs. 


Tengdar fréttir

Segir nemendur og kennara munu hópast til Reykjavíkur

„Ég hef þungar áhyggjur af þessu máli, ekki síst hvað varðar okkar skóla hér á Ísafirði sem og aðra tónlistarskóla úti á landi,“ segir Sigríður Ragnarsdóttir, skólastjóri Tónlistarskóla Ísafjarðar, um hugmyndir sem Illugi Gunnarsson menntamálaráðherra hefur viðrað – róttækar breytingar á fjármögnun og skipulagi tónlistarnáms á framhaldsstigi.




Fleiri fréttir

Sjá meira


×