Sakfelling ekki brot á tjáningarfrelsi

„Mannréttindadómstóllinn hefur verið lítt hrifinn af því að varpa fólki í fangelsi fyrir það sem það segir, en í þessum dómi komst meirihluti dómara að þeirri niðurstöðu að kærendur hafi þurft að þola skerðingu á tjáningarfrelsi,“ segir Davíð Þór Björgvinsson, fyrrverandi dómari við Mannréttindadómstól Evrópu, um dóm dómstólsins sem fjallaði um hatursáróður gegn samkynhneigðum.

Þetta er dómur í máli Vejdeland og annarra (Vejdeland and others) gegn Svíþjóð frá 9. febrúar 2012. Í hann vísar Björg Valgeirsdóttir, lögmaður Samtakanna "78, við mat á því hvort refsing fyrir að breiða út hatursáróður í garð samkynhneigðra sé nauðsynleg.

„Kærandi og aðrir með honum dreifðu bæklingum í menntaskóla í Svíþjóð þar sem fjallað var á móðgandi hátt um samkynhneigða. Þeir voru dregnir fyrir dóm í Svíþjóð og dæmdir fyrir að dreifa bæklingunum.

Sjá einnig: Samtökin 78 skoðuðu ummæli tæplega þrjátíu einstaklinga

Þeir voru ekki sáttir við þetta og fóru með það fyrir Mannréttindadómstólinn á þeim forsendum að það hafi verið brotið á tjáningarfrelsi þeirra. Niðurstaðan varð að Mannréttindadómstóllinn taldi það ekki brot á tjáningarfrelsi að sakfella menn fyrir slíkan hatursáróður. Það er nokkuð víðtæk vernd sem samkynhneigðum er veitt með þessum dómi en óvíst hvort hann hafi nægt fordæmisgildi þar sem dómarar voru klofnir í forsendum sínum.“

Dæmi um kærð ummæli

Fréttablaðið birtir hér ummæli eins þeirra kærðu:

„Samtökin 78 sem eru Hommar og Lesbíur og eru alltaf að færa sig upp á skaftið eins og sagt var í gamladaga. Eru þessi samtök ekki búin að ganga nógu langt þegar þau eru komin með þjóðkirkjuna í vasan - Stjórn Reykjavíkur upp á armin með hinsegingöngur sem taka fram 17 júni hátíðarhöld þjóðarinnar - merkingar á götum borgarinnar - sér fána um alla borg. -- Og á nú að fara að stíga sama spor og þýsku nazistarnir gerðu og kommarnir í Rússlandi að fara að heilaþvo börnin í landinu með kynlífsfræðslu samkynhneigðra. Fræðslu um það hvernig kynvillingar þessa lands og annara búa til börnin sem eiga að erfa land og þjóð. -- NEI - Nú er ég að minnsta kosti að fá nóg...“

„Hvaða fræðsluprógram ertu að tala um ??? Sjúkdóm þessa fólks ??? Kynórana ???? -- Þetta er þér svo mikið áhugamál að ég fer að halda að þú sért hommi og einna af þessu fólki.“