Russell Crowe mættur til landsins

Nýsjálenski stórleikarinn Russell Crowe lenti á Reykjavíkurflugvelli á tíunda tímanum í kvöld. Létt var yfir leikaranum en hann spjallaði í dágóða stund við flugvallarstarfsmenn áður en hann hélt á brott.

Fjölskylda Crowe var með í för, þá sást einnig til myndarlegs gítars sem leikarinn hefur ekki viljað skilja eftir.

Crowe mun fara með aðalhlutverkið í kvikmyndinni Noah en hún verður að hluta til tekin upp hér á landi.

Tökur munu standa yfir í fjórar vikur en tökustaðirnir eru fjölmargir. Fjöldi manns kemur að framleiðslunni, þá eru leikararnir Anthony Hopkins og Emma Watson væntaleg til landsins vegna kvikmyndarinnar.

Eins og nafnið gefur til kynna þá fjallar kvikmyndin um Nóa og örkina hans. Crowe, sem fékk Óskarsverðlaun fyrir leik sinn í kvikmyndinni Gladiator, mun fara með hlutverk Nóa.

Það er síðan vert að benda á að einkaþota Crowe er af gerðinni Gulfstream V. N55GV. Þessar vélar eru vægast sagt glæsilegar eins og sjá má á myndunum hér til hliðar.