Ríkisstjórnin vill að Ísland verði stofnaðili að fjárfestingabanka fyrir Asíu

Ísland mun óska þess að gerast stofnaðili að nýjum fjárfestingabanka fyrir Asíu sem er í burðarliðnum. Þetta var ákveðið á ríkisstjórnarfundi fyrr í dag.

Fjöldi ríkja er aðili að bankanum, þar með talin flest Evrópuríki. Ekki liggur fyrir hvert framlag Íslands til bankans verður en gert er ráð fyrir að heildarstofnfé bankans nemi allt að 100 milljörðum bandaríkjadala.

Samningaviðræður milli stofnaðila um endanlega stofnsetningu bankans eru framundan en stefnt er að því að þeim ljúki fyrir árslok.

Ljóst er að höfuðstöðvar bankans verða í Peking en hann mun bera nafnið Asian Infrastructure Investment Bank (AIIB).

Í tilkynningu frá utanríkisráðuneytinu kemur fram að það sé mat ríkisstjórnarinnar að aðild að fjárfestingabankanum  muni styrkja enn frekar góð samskipti Íslands og Asíuríkja og styðja við nýja vaxtarbrodda á viðskiptasviðinu.

„Asía er sá hluti efnahagskerfis heimsins sem vex hvað hraðast. Fyrir liggur að í álfunni hefur og mun eiga sér stað gríðarleg uppbygging samgöngukerfa, orkukerfa, fjarskiptakerfa o. fl.  Starfsemi AIIB mun styðja við starfsemi fjölþjóðlegra fjármálastofnana sem þegar sinna þróun og fjármögnun innviðauppbyggingar, svo sem Alþjóðbankans og Þróunarbanka Asíu,“ segir í tilkynningunni.