Ólafur Þ. Stephensen ráðinn ritstjóri Fréttablaðsins

Ari Edwald, forstjóri 365 miðla, segir að tvenns konar áherslur liggi að baki breytingunni; efling Fréttablaðsins sem helsta dagblaðs landsins og það markmið að styrkja samvinnu fjölmiðla fyrirtækisins. „Fréttablaðið hefur náð gífurlegum árangri á undanförnum árum. Við viljum byggja á þeim árangri og ná enn lengra. Við viljum líka láta reyna á að þróa frekar samvinnu milli miðla 365 í fréttaöflun og -vinnslu. Við teljum, að öllum öðrum ólöstuðum, að Ólafur Stephensen sé hæfasti maðurinn sem við getum fengið í það verkefni. Jóni Kaldal vil ég þakka störf hans í þágu Fréttablaðsins, hann hefur átt drjúgan þátt í árangri blaðsins á undanförnum árum."

„Ég lít á starfið hjá Fréttablaðinu sem frábært tækifæri til að vinna áfram við blaðamennsku. Fréttablaðið á mikil sóknarfæri á blaðamarkaðnum að mínu mati og ég hlakka til að taka þátt í að nýta þau tækifæri," segir Ólafur Þ. Stephensen. „Útbreiðsla Fréttablaðsins er einstök og blaðið nýtur vaxandi trausts hjá lesendum sínum. Ég lít á það sem mitt meginhlutverk að efla það traust enn frekar með faglegum og metnaðarfullum fréttaflutningi."

Ólafur Þ. Stephensen er 41 árs og hefur starfað við blaðamennsku og tengd störf frá 1987. Hann var ritstjóri Morgunblaðsins 2008-2009 og ritstýrði þar áður fríblaðinu 24 stundum. Hann var aðstoðarritstjóri Morgunblaðsins um sjö ára skeið og áður blaðamaður þess í meira en áratug. Hann var forstöðumaður upplýsinga- og kynningarmála Símans 1998-2000 og forstöðumaður stefnumótunar- og samskiptasviðs Samtaka atvinnulífsins 2000-2001. Ólafur er með BA-próf í stjórnmálafræði frá Háskóla Íslands og MSc-gráðu í alþjóðastjórnmálum frá London School of Economics and Political Science. Þá hefur hann í vetur lagt stund á diplómanám við IESE-viðskiptaháskólann í Barcelona á Spáni. Ólafur er kvæntur Halldóru Traustadóttur, forstöðumanni reksturs útibúa hjá Íslandsbanka. Þau eiga þrjú börn.