Ofbauð og þreif sjálf klósettið á Landspítalanum

„Mér fannst ég ekki þurfa ræða um þetta fyrr en núna eftir alla þessa umfjöllun,“ segir kona, sem var sjúklingur á Landspítalanum Fossvogi í haust .

Hún segir farir sínar ekki sléttar eftir dvöl sína á spítalanum og telur að stofan sem hún var á hafi langt því frá verið þrifin nægilega vel. Konan tók myndir á meðan hún var á spítalanum og tala þær sínu máli.

„Ég kom fyrst inn á Bráðamóttökuna og var síðan í framhaldinu sett inn á stofu með öðrum sjúklingum. Það reyndist erfitt fyrir læknana að átta sig á því af hverju ég var svona veik, með mikinn hita og almennt illa haldin af verkjum. Það var jafnvel talið að ég væri með einhvern smitandi sjúkdóm og því var ákveðið að flytja mig yfir í einstaklingsstofu.“

Konan segir klósettið inni á stofunni hafa verið sérstaklega slæmt.

„Þegar ég opnaði dyrnar inn á það, kom svona fnykur á móti mér eins og það hefði ekki verið þrifið í langan tíma. Það var einhvern veginn grásvart að innan. Ég gat ekki hugsað mér að notast við þessa aðstöðu og þreif einfaldlega sjálf eins vel og ég gat. Það kom enginn að þrífa fyrsta daginn minn á stofuna en á degi tvö kom maður inn til að þrífa.“

Að sligast undan álagi

Starfsmenn spítalans hafa kvartað undan óþrifnaði á spítalanum. Tólf Pólverjar sem vinna verk sem 35 unnu áður eru að sligast undan vinnuálagi.

Ingólfur Þórisson, framkvæmdastjóri rekstrarsviðs Landsspítalans, sagði í viðtali við Stöð 2 á dögunum að sú stefna hafi verið tekin eftir hrun að draga úr hreinlæti á spítalanum til að spara peninga.

Konan segir að það hafi verið greinilegt að sá sem sá um þrif á stofunni sem hún dvaldi á hafi verið í tímaþröng.

„Þetta var almennilegur maður sem bar af sér góðan þokka. Hann talaði ekki íslensku og ég skyldi lítið hvað hann sagði, en það skipti auðvitað engu máli. Ég ákvað samt að fylgjast með honum og hvernig hann ætlaði sér að þrífa stofuna. Hann þreif klósettið nokkuð illa en það sem vakti athygli mína var að hann notaði sömu tusku á klósettið sjálft og á hillur og annað inni á baðherberginu. Síðan hélt hann áfram með tuskuna og þurrkaði yfir slökkvarana, það fyrsta sem hjúkrunarfólk snertir áður en komið er inn í stofuna.“

Skipti aldrei um hanska

Konan segir að maðurinn hafi haldið áfram að þrífa næstu stofur með sömu hönskum og sömu tusku sem hann hafði notað inni hjá henni. Hanskar og tuska sem höfðu farið ofan í klósettið inni á stofunni hjá henni.

„Gólfið og niðurfallið var ógeðslegt og það var ryk á nánast öllu. Það var til að mynda myglusveppur undir og ofan á sérstöku statífi sem er notað til að styðja sig við þegar maður stendur upp af klósettinu. Allur frágangur á stofunni var til skammar, lampar með biluðum perum, hengin að detta niður og baðmottur sem voru að rotna í sundur.“

Konan var samt sem áður ánægð með þá þjónustu sem hún fékk frá starfsfólki spítalans.

„Ég fékk frábæra þjónustu á spítalanum hvað varðar meðhöndlun og rannsóknir en mér var einfaldlega ofboðið þegar kom að þrifnaði á staðnum. Hefði ég verið með bráðsmitandi sjúkdóm, sem jafnvel var haldið í fyrstu, hefði öll deildin smitast.“

Ræstingafyrirtækið Hreint ehf. hefur frá því í febrúar á þessu ári séð um ræstingar á Landspítalanum í Fossvogi. Tólf starfsmenn sjá um þrifin.

Stéttarfélaginu Eflingu hafa borist kvartanir frá nokkrum starfsmönnum, sem allir eru pólskir, vegna álags og bágra kjara. Þann 11. nóvember síðastliðinn var fulltrúa Eflingar meinaður aðgangur að fundi ræstingarfólksins og forráðamanna Hreint ehf.