Viðskipti innlent

Nýtt fyrirtæki sinnir lögfræðilegri skjalagerð á netinu - "Ódýrara og einfaldara“

Hanna Rún Sverrisdóttir skrifar
Kristrún Elsa Harðardóttir er eigandi Ísskjals, hún stofnaði fyrirtækið og útbjó síðuna ein síns liðs.
Kristrún Elsa Harðardóttir er eigandi Ísskjals, hún stofnaði fyrirtækið og útbjó síðuna ein síns liðs.
Íslenska skjalagerðin er nýtt fyrirtæki sem sinnir lögfræðilegri skjalagerð, eingöngu í gegnum internetið. Fyrirtækið var stofnað í vikunni og er stofnandinn ung kona, lögfræðingurinn Kristrún Elsa Harðardóttir.

„Að mér best vitandi er þetta nýmæli á íslenskum markaði, að hægt sé að panta sérhannaða löggerninga í gegnum internetið og fá þá senda í tölvupósti innan fárra daga,“ segir Kristrún.

Kristrún segir að með því að halda viðskiptunum eingöngu á netinu sé hægt að halda kostnaði viðskiptavinarins í lágmarki. Allur kostnaður við gerð skjalsins sem er pantað er innifalinn í verðinu sem eru uppgefið á síðunni. Það sé því enginn falinn kostnaður.

Hún segir jafnframt að með því að halda viðskiptunum eingöngu á internetinu sé einnig hægt að halda umstangi við skjalagerð í lágmarki. Viðskiptavinir panta sérhannaða löggerninga í gegnum vefsíðuna og fá skjalið sent í tölvupósti innan þriggja til fimm virkra daga.

Kristrún útskrifaðist úr lögfræði frá Háskóla Íslands fyrir rúmum þremur árum síðan. Hún hefur hlotið réttindi til málsflutnings fyrir héraðsdómi og hefur starfað við lögmennsku. Hún starfar nú sem lögfræðingur hjá Útlendingastofnun.

Fékk hugmyndina fyrir þremur vikum – Síðan fór í loftið í fyrrakvöld

„Síðan fór í loftið í fyrrakvöld, ég er strax búin að fá sendar fyrirspurnir en auðvitað er þetta bara að fara af stað,“ segir Kristrún.

Hugmyndina að síðunni fékk Kristrún fyrir þremur vikum síðan og fann í kjölfarið forrit á netinu og lærði sjálf að búa til vefsíðu.

„Ég gerði þetta algjörlega ein og hef eytt öllum mínum frítíma þessar vikur í að koma síðunni af stað. Það erfiðasta við þetta var að læra að gera vefsíðu. En skjölin kann ég að gera enda hef ég reynslu af skjalagerð úr fyrri störfum,“ segir Kristrún.

„Síðan ég útskrifaðist hafa fjölmargir, vinir og vandamenn verið í sambandi við mig um gerð skjala og því er ég viss um að það sé markaður fyrir þetta hér á landi,“ segir hún.

Kristrún segir að það sé alltaf að færast í auka að fólk nýti sér lögfræðileg skjöl, til dæmis sé það orðið mun algengara nú en áður að fólk geri með sér kaupamála. Einnig hefur vantað úrræði fyrir fólk í fasteignaviðskiptum sem vill ekki eiga viðskiptin í gegnum fasteignasölur. Ísskjal getur séð um slíka skjalagerð.

Kristrún segir að ef fyrirtækið gangi vel ætli hún sér að ráða inn lögfræðing til þess að sjá um verkefnin með sér. Hún vilji ekki hætta í starfi sínu hjá Útlendingastofnun sem henni finnst mjög skemmtilegt.

„Í vinnunni minni hitti ég mikið af fólki, alls konar fólki og vinnan getur verið mjög skemmtileg þó hún sé vissulega erfið á köflum. En ég vildi stofna þetta fyrirtæki líka, hugmyndin var einfaldlega of góð til framkvæmda hana ekki,“ segir Kristrún.






Fleiri fréttir

Sjá meira


×