Nýnasistar misnota nafn Ásatrúarfélagsins

„Við höfnum því að Ásatrú sé notuð til að réttlæta kynþáttahyggju, hernaðarhyggju eða dýrafórnir,“ segir í yfirlýsingu á heimasíðu Ásatrúarfélagsins sem birt var á þriðjudag.

Tilefnið er ítrekaðar tilraunir erlendra einstaklinga og hópa til að spyrða öfgafullar skoðanir sínar við Ásatrúarfélagið, en jafnframt til að gefa málstað sínum frekari vigt.

„Þetta er yfirlýsing sem hefði helst átt að koma út einu sinni á ári undanfarin 38 ár,“ segir Hilmar Örn Hilmarsson allsherjargoði.

Hann segir að árlega komi fjöldi erlendra gesta til Ásatrúarfélagsins. Sumir þeirra telji sig, að lokinni heimsókn, geta talað fyrir hönd trúfélagsins.

„Fólk hefur látið líta út fyrir að einhverjar þýðingar sem það er að bulla með séu gerðar með okkar velþóknun. Við viljum ekki að verið sé að nota nafnið okkar til að gefa því sem það er að gera einhvers konar gildi.“

Hilmar segir að fjöldi öfgahópa sem tengi sig við ásatrú séu vandamál. „Þarna er lið sem er hægra megin við Hitler sem í sumum tilfellum notar ásatrú sem yfirvarp.“

Hann segir afkima bandaríska söfnuðarins Christian identidy hafa tengt sig ásatrú. „Svo kom í ljós að það var bara arísk kristni. Einhver nasistakristni. Við ítrekum að þetta eru ekki við,“ segir Hilmar.

Hilmar Örn segir að ástæða yfirlýsingarinnar nú sé klofningur sem sé að eiga sér stað í danska ásatrúarsöfnuðinum Forn siðr. Hluti safnaðarins hefur tekið upp kenningar bandaríska kennismiðsins Stephen McNallen um að trúin sé þeim að einhverju leyti í blóð borin.

Í helsta kenniriti Stephens segir meðal annars: „Þess vegna er trúin [ásatrú] ekki fyrir allt mannkyn, heldur frekar trú sem kallar á sína.“