Mourinho vildi ganga í skrokk á Wenger

Bókin José Mourinho: Up Close and Personal, eftir blaðamanninn Robert Beasley, kemur út næsta fimmtudag.

Daily Mail birti í dag valda kafla úr bókinni, þ.á.m. um ríginn á milli Mourinho og Arsene Wenger, knattspyrnustjóra Arsenal.

Litlir kærleikar eru á milli Mourinhos og Wengers eins og margoft hefur komið fram.

Rígurinn á milli þeirra náði nýjum hæðum eftir að Mourinho sneri aftur til Chelsea sumarið 2013. Portúgalinn sagði, sem frægt er orðið, að Wenger væri „sérfræðingur í að mistakast“, og svo lenti þeim saman á hliðarlínunni í leik Chelsea og Arsenal í október 2014.

Beasley greinir frá því í bókinni að Mourinho hafi talað um að ganga í skrokk á Wenger eftir að Frakkinn gagnrýndi söluna á Juan Mata til Manchester United.

„Einn daginn mun ég finna hann í fjöru og rústa á honum andlitinu,“ hefur Beasley eftir Mourinho sem virðist, eins og bókarhöfundur segir, hreinlega elska að hata Wenger.

Umræddan kafla má lesa með því að smella hér.