Lögreglumaður kærður fyrir gáleysislega hegðun á slysstað

Ríkissaksóknari hefur hafið rannsókn á lögreglumanni sem er sakaður um að hafa afturkallað aðstoð neyðarlínunnar eftir að unnusta hans ók á barn. Það voru foreldrar barnsins sem kærðu.

Valtýr Sigurðsson ríkissaksóknari staðfestir í samtali við Vísi að málið hafi komið inn á þeirra borð fyrir um viku. Hann hefur falið fulltrúa sínum að rannsaka málið en embættið rannsakar lögregluna þegar svo ber við. Þá hefur embættið aðstöðu hjá lögregluskólanum til þess að rannsaka málið.

Það var DV sem greindi frá málinu í dag. Þar kemur fram að unnusta lögreglumannsins hafi ekið á barnið þannig það fór undir bílinn fyrir nokkrum vikum. Lögreglumaðurinn var með í för. Hann á að hafa hringt í neyðarlínuna og tilkynnt að hann hefði orðið vitni að óhappinu. Hann sagði hinsvegar ekki í samtali við neyðarvörð að unnustan hefði verið ökumaðurinn samkvæmt DV.

Nóttina eftir óhappið á barnið að hafa verið með uppköst og í ljós komið að það var með heilahristing.

Foreldrarnir kærðu lögreglumanninn fyrir um viku síðan fyrir kæruleysislega hegðun á slysstaðnum.

Lögreglumaðurinn mun áður hafa fengið tiltal frá lögreglunni. Þá einnig vegna unnustu hans sem ók drukkin. Aftur var lögreglumaðurinn með í för. Kollegar mannsins stöðvuðu konuna en lögreglumaðurinn reyndi að fá samstarfsmenn sína til þess að láta málið niður falla á vettvangi. Í kjölfarið fékk hann alvarlegt tiltal en ekki þótti ástæða til þess að víkja honum frá störfum samkvæmt DV.

Fram kemur í frétt DV að mikil ólga sé á meðal lögreglumanna vegna málsins. Margir eru óánægðir með að maðurinn sé enn að störfum.

Eins og fyrr segir er málið í rannsókn. Það er á frumstigi.