Kostar 3.500 að aka hálendisveg austur

Greiða þarf 3.500 krónur fyrir að aka hálendisveg austur á land samkvæmt áætlun hóps sem undirbýr vegalagninguna í einkaframkvæmd. Leiðin styttist um 200 kílómetra. Vegurinn á að kosta 5,5 milljarða króna. Ekki á að óska ríkisábyrgðar.

„Við teljum okkur bara eiga rétt á þessu,“ segir Sigurður Gunnarsson, hagfræðingur og járnsmiður og einn forvígismanna hóps sem vill hálendisveg norðan Vatnajökuls.

Hálendisvegurinn á að ná frá Nýjadal á Þjórsársvæðinu að sunnaverðu og að Kárahnúkum að austanverðu. Tæplega 40 kílómetra leggur yrði einnig norður í land, til dæmis að Svartárkoti í Bárðardal.

Sigurður segir að fari allt að óskum verði vegurinn tilbúinn eftir fimm til sex ár. Áætlaður kostnaður sé 5 til 5,5 milljarðar króna. Þessi upphæð fáist til baka á átta til tíu árum með 3.500 króna veggjaldi austur og 2.000 króna gjaldi norður. Vegirnir, samtals um 170 kílómetrar, verði þá eign ríkisins.

Sigurður segir akstursleiðina milli Reykjavíkur og Egilsstaða styttast um allt að 230 kílómetra með Vatnajökulsleiðinni. Það skipti gríðarlegu máli varðandi flutningaskostnað og ferðamennsku. „Svo snýst þetta um rétt almennings á að fá að njóta hálendsins. Það er einstök upplifun,“ segir Sigurður.

Um þrjátíu kílómetra kafli af hálendisveginum yrði innan Vatnajökulsþjóðgarðs. Ekki er gert ráð fyrir veginum í lögum um þjóðgarðinn þótt Austlendingar hafi sóst eftir því.

„Við ræddum hins vegar við bæði innaríkisráðherra og umhverfisráðherra síðustu ríkisstjórnar og fengum vinsamlegar móttökur. Í innaríkisráðuneytinu vóg ekki síst þungt að Suðurlandsvegur getur lokast vegna náttúrhamfara,“ segir Sigurður.

Næstu verkefni að sögn Sigurðar eru meðal annars að rannsaka veðurfar og gera mat á umferð og mögulegum opnunartíma vegarins.

Boða á til stofnafundar félagsins Hálendisvegar ehf. á næstunni. Hópurinn vill fá sveitarfélögin og helstu stofnanir á svæðinu til liðs við sig. Undirtektirnar segir Sigurður hafa verið bestar hjá stóru sveitarfélögunum.

„Minni sveitarfélögin eru hrædd við að þetta tefji vegaframkvæmdir á láglendi. En þetta á engin áhrif að hafa á aðra vegagerð,“ segir Sigurður sem undirstrikar að byggja eigi í veginn einkaframkvæmd. Stuðningur í formi peninga eða ábyrgða verði ekki sóttur til ríkisins.

„Ég sé ekki annað en að menn myndu vera jákvæðir ef þetta reynist framkvæmanlegt,“ segir Björn Ingimarsson, bæjarstjóri Fljótsdalshéraðs.