Júlíspá Siggu Kling - Vog: Með friðinn að leiðarljósi

Varkára en samt öfluga vogin mín. Þú skalt vera þakklát fyrir alla þá heppni sem er að koma til þín og leysir upp leiðindi, ef þér finnst þau hafa verið hjá þér. Þú munt hægt en örugglega sjá að þú ert að gera rétt. Þú átt eftir að gera mjög gott samkomulag við einhvern náinn þér og þér á eftir að líða miklu betur með það.

Friður er táknið sem þú þarft að húðflúra á brjóstið á þér. Þér á eftir að finnast lífið svo létt þegar þú ert búin að dreifa friði í kringum þig. Þú skalt hrósa óvini þínum eða þeim sem hafa verið leiðinlegir við þig. Þá er eins og þú losir þig við þá og alla orku sem þeir hafa sent þér.

Þú hefur dálitlar áhyggjur af peningamálum en haustið á eftir að færa þér seðlana. Það kom fram hjá Happdrætti Háskóla Íslands að vogin og bogmaðurinn séu heppnustu merkin á jörðinni, svo mundu það, elsku hjartað mitt. Þú ert nefnilega að sigla inn í tíma þar sem þú munt ráða við allt sem tengist peningum og velferð. Þú getur samt haft áhyggjur af því, en það er þitt val.

Það er númer eitt, tvö og þrjú að vera trygglyndur gagnvart sannri ást og vináttu. Ef þú ert á lausu þá bið ég þig um að setja alvöru í ástina. Skoða það sem skiptir máli og henda hinu á haugana. Þú átt eftir að fá viðurkenningu frá fólki í kringum þig sem þú verður mjög stolt af. Þú ert að fara að upplifa mikið ævintýri og gera hluti sem þú bjóst alls ekki við.

Mottó: Krafturinn býr í útgeisluninni.

Frægir í voginni: Glúmur Baldvinsson stjórnmálafræðingur, Hjalti flugþjónn, Ingi í Sign, Jón Axel Ólafsson athafnamaður, Matt Damon leikari, Íris Berg fatahönnuðurinn minn, Mary Poppins, Steingrímur Sævarr Ólafsson fjölmiðlaráðgjafi, Svanhildur Hólm Valsdóttir aðstoðarmaður ráðherra og sjónvarpskona, Hanna Birna Kristjánsdóttir þingkona.