Júlíspá Siggu Kling - Krabbi: Þú getur allt

Elsku krabbinn minn. Ég get alveg sagt það hundrað prósent að þetta er þitt sumar. Ég er hins vegar ekki að segja að það verði alltaf bara hlátur. Þú hefur verið að fara í gegnum mjög mikla hluti en þú ert að leysa mikinn vanda á leiðinni. Þú ert ánægður þegar hlutirnir ganga upp, þó svo að allt gangi ekki alveg hundrað prósent upp.

Þetta verður eftirminnilegt sumar sem sýnir þér að þú getur allt. Ekki vera leiður yfir annarra manna röfli og einhverjum sem er að stinga þig. Gerðu bara þitt besta til að láta þér líða vel, því þú ert á leiðinni upp stigann. Það vantar jafnvel nokkrar tröppur í þennan stiga en þú ert svo hugrakkur núna að þú stekkur upp stigann og hreinsar burt svo mikla angist. Það er hláturinn sem á eftir að gefa þér kraftinn.

Þú ert að fara yfir í þinn afmælistíma og þegar við erum á þeim tímamótum þá gerast ótrúlega merkilegir hlutir sem þú þarft að taka eftir. Mér finnst það svo gott hjá þér að einblína ekki alltaf á vandamálin, heldur á lausnirnar. Það er svo líkt þér. Það er að koma svo mikil breyting á orku þinni. Þú átt eftir að láta aðra sjá að þú ert sterkur við stjórn á þínu lífi. Vertu sú breyting sem þú vilt sjá í heiminum sagði Gandhi og ég sé að það er akkúrat það sem er að gerast hjá þér. Það er viss viðkvæmni í ástamálum, en þú þarft bara að fara varlega. Það eru skilaboðin.

Mottó: Ekki leita að hamingjunni, þá er ég ekki heima þegar hún bankar.



Frægir krabbbar: Bryndís Schram fyrirmyndin mín, Sigga Lorange ostabúðarskvísa, Auddi Blö sem við elskum öll, Dagur B. Eggertsson borgarstjóri og dúlla, Ólafur Stefánsson handboltakappi og heimspekingur, Edda Sif, Sindri Sindrason, Ásdís Halla Bragadóttir, Hjörvar Hafliðason.