Höskuldur: Fullyrðingar Jóhönnu rangar

Höskuldur Þórhallsson, þingmaður Framsóknarflokksins, segir að fullyrðingar forsætisráðherra í bréfi til forsætisráðherra Noregs séu rangar. Hann segir að hvorki hann né Sigmundur Davíð Gunnlaugsson, formaður Framsóknarflokksins, hafi farið fram á 2000 milljarða lán frá Noregi.

Framsóknarmenn hafa sakað Jóhönnu um að reyna koma í veg fyrir að Íslendingar fái lán frá Norðmönnum framhjá Alþjóðagjaldeyrissjóðnum. Sjálf segir Jóhanna að um fráleitar ásakanir sé að ræða. Forsætisráðuneytið birti í dag bréfaskipti Jóhönnu Sigurðardóttur og Jens Stoltenbergs vegna málsins.

„Þegar hún leggur málið svona upp getur hún ekki fengið annað en svona svar," segir Höskuldur. Hann segir að hvorki hann né Sigmundur hafi talað um svona hátt lán við norsku þingmennina. Þeir hafi þess í stað lagt áherslu á að koma á lánalínu á milli landanna.

Höskuldur segir að bréf Jóhönnu staðfesta það sem hann og Sigmundur hafi áður sagt um málið. „Bréfið staðfestir það sem við heyrðum í Noregi að Jóhanna væri að kvarta yfir því að sér reyndist málið erfitt heima fyrir. Bréfið staðfestir allt það sem við höfum sagt í málinu. Sérstaklega að það hefur ekki enn borist formleg beiðni frá Íslendingum um lánalínu eða lán frá Noregi óháð Alþjóðagjaldeyrissjóðnum."

Höskuldur er enn þeirra skoðunar miklar líkur séu á því að Íslendingar fái lán frá Norðmönnum verði slík beiðni send. „Afstaða okkar er óbreytt og við munum fylgja þessu eftir."