Hálka og hætta á vatnstjóni

Veðurstofa Íslands varar við mikilli hálku og hættu á vatnstjóni vegna talsverðrar úrkomu og bráðnunar snjós og ís í dag.

Birta Líf Kristinsdóttir, veðurfræðingur hjá Veðurstofu Íslands, telur mikilvægt að fólk hafi varann á vegna veðursins. „Það þarf að passa að ekkert stífli niðurföll,“ segir Birta. Hún brýnir einnig fyrir þeim sem verða á ferðinni í dag að fara varlega vegna mikillar hálku sem gæti orðið um land allt vegna hlýnandi veðurs.

„Það spáir talsverðri rigningu sunnan og vestanlands, sérstaklega seinnipartinn, sem samfara hlýnandi veðri og bráðnun snjós gæti valdið talsverðum vatnavöxtum,“ segir Birta. 

Úrkoman verður mest í kringum fjöll og jökla sunnan- og vestanlands. Þar gæti sólarhrings afrennsli, það er samanlögð úrkoma og snjóbráðnun, farið yfir hundrað millimetra á morgun segir í tilkynningu frá Veðurstofunni.