Ginnungagap á velli Gullbjörnsins

Risavaxin hola myndaðist á Top of the Rock golfvellinum í Missouri-ríki í Bandaríkjunum í gær. Völlurinn er hannaður af Gullbirninum Jack Nicklaus.

Holur sem þessar myndast þegar jarðvegur gefur sig og hola myndast ofan í jörðina. Holan sem um ræðir er 24 metrar í þvermáli og rúmlega tíu metra djúp og myndaðist nærri æfingasvæðinu á golfvellinum.

Í frétt USA Today segir að enginn hafi slasast af völdum holunnar og segja forsvarsmenn vallarins að engin sérstök hætta stafi af holunni að svo stöddu.