Hazard er tilbúinn í 45 mínútur

Eden Hazard mun koma við sögu í leik Chelsea og Crystal Palace en getur þó ekki leikið meira en 45 mínútur. Þetta sagði Maurizio Sarri, knattspyrnustjóri Chelsea.

Hazard hefur ekki spilað fyrir Chelsea síðan í stórleiknum við Manchester United vegna meiðsla í baki.

„Hazard tók þátt í stórum hluta æfingarinnar í gær. Hann er ekki tilbúinn í 90 mínútur því þetta var fyrsta æfingin hans í tvær vikur,“ sagði Sarri á blaðamannafundi í dag.

„Hann getur spilað 40-45 mínútur sem er mikilvægt fyrir okkur.“

Sarri vildi ekki gefa upp hvort hann ætlaði að byrja með Hazard eða láta hann koma inn í seinni hálfleik.