Innlent

Hrólfur axlar ábyrgð en vill uppbyggilegri umræðu í braggamálinu

Kolbeinn Tumi Daðason skrifar
Hrólfur Jónsson, fyrrverandi skrifstofustjóri eignaþróunar hjá Reykjavíkurborg, kallar eftir uppbyggilegri umræðu um braggana eða húsin í Nauthólsvík.
Hrólfur Jónsson, fyrrverandi skrifstofustjóri eignaþróunar hjá Reykjavíkurborg, kallar eftir uppbyggilegri umræðu um braggana eða húsin í Nauthólsvík. Vísir

Hrólfur Jónsson, fyrrverandi skrifstofustjóri skrifstofu eigna og atvinnuþróunar hjá Reykjavíkurborg, segir að ríkt hafi óvissa um kostnað við braggann í Nauthólsvík. Slík óvissa sé alltaf fyrir hendi þegar ráðist er í breytingar á gömlu húsnæði. Þetta kom fram í máli Hrólfs í Morgunútvarpinu í morgun en þar viðurkenndi hann mistök og sagði framúrkeyrslu kostnaðar á sína ábyrgð.

Hrólfur, sem var stjórnandi hjá borginni í á fjórða áratug og tók við starfinu árið 2012, lét af störfum hjá borginni í apríl síðastliðnum. Hann segir liggja ljóst fyrir að 120 milljónum króna hafi verið varið í verkefnið án þess að fyrir lægi heimild til þess.

„Það voru auðvitað bara mistök sem ég tek á mig,“ segir Hrólfur.

Blaðamenn virða fyrir sér hin umtöluð dönsk strá. visir/villhelm

Vill að innri endurskoðandi fái andrými

Kostnaður við endurbygginguna fór úr áætluðum 155 milljónum í 415 milljónir. Hrólfur sagði að borgarfulltrúar hefðu ekki verið meðvitaðir um framúrkeyrslu verkefnisins fyrr en í ágúst síðastliðnum. Þá lagði fjármálahópur borgarinnar spilin á borðið þegar endurskoða átti fjárfestingaráætlunina síðsumars.

Hrólfur sagði mikilvægt að fólk gæfi innri endurskoðanda tíma til að fara yfir málið. Þá kæmi í ljós hvernig þetta hefði þróast. Þetta hefði ekki verið vegna einnar ákvörðunar. Rifjaði hann upp störf sín hjá slökkviliðinu á árum áður til samanburðar.

„Ég var lengi í slökkviliðinu. Þú mætir á eldstað og veist ekki neitt. Það eru þrjár hurðir og þú þarft að fara inn um einhverja þeirra. Þú getur ekki annað.“

Hrólfur segir ástæðu þess að hann sé til í að ræða málin svo opinskátt vera að hann starfi ekki lengur hjá borginni. Hann sé ósáttur við umræðuna enda líði starfsfólki borgarinnar illa.

Dagur B. Eggertsson borgarstjóri og Eyþór Arnalds, oddviti Sjálfstæðisflokksins, sem gagnrýnt hefur meirihlutann harðlega í málinu. Vísir/Vilhelm

Ekki sammála að verkefnið sé endilega klúður

„Það er þannig að þessi pólitíski slagur sem er núna í gangi í Reykjavíkurborg hefur gríðarlega slæm áhrif á starfsfólk Reykjavíkurborgar og það á mjög erfitt með að verja sig vegna þess að um leið og það gerir það að þá er því um leið borið það á brýn að það sé að draga taum einhverra stjórnmálamanna. Ég er hættur störfum og því get ég komið hér.“

Þáttastjórnandinn Sigmar Guðmundsson fullyrti að verkefnið væri klúður.

„Það er ekkert endilega víst,“ sagði Hrólfur. Minnihlutinn í borginni hafi farið offari vegna málsins.

„Já, mér finnst það. Það á segja sem svo að þessi framkvæmd, þó það hafi ekki verið meiningin, að hún sé saga stríðsins. Auðvitað færðu Íslendingar fórnir og urðu vissulega ríkir, í þessu verkefni er verið að fórna fólki en eftir standa glæsileg mannvirki.“

Þá hvetur hann til uppbyggilegrar umræðu. Að rætt verði um hús en ekki bragga. Endalaust sé rætt um strá en fólk skilji ekkert hvað sé á bak við stráin. Nú sé verið að ræða um reikninga vegna snitsel.

„Finnst þér þetta uppbyggileg umræða?“


Tengd skjöl

Sundurliðaðir reikningar vegna braggans í Nauthólsvík (567 síður)


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.