Erlent

Höfrungur og mörgæsir yfirgefin á sædýrasafni

Kristín Ólafsdóttir skrifar
Höfrungurinn Honey virðist illa haldinn í lítilli laug á safninu.
Höfrungurinn Honey virðist illa haldinn í lítilli laug á safninu. Mynd/Animal Rights Center Japan

Mikil reiði hefur gripið um sig í Japan eftir að í ljós kom að höfrungur, 46 mörgæsir og hundruð fiska hafa þurft að dvelja ein í yfirgefnu sædýrasafni svo mánuðum skiptir. Breska dagblaðið The Guardian greinir frá.

Samtök um dýravelferð í Japan hafa lengi varað við því að dýrin eigi á hættu að drepast verði þeim ekki bjargað úr Inubosaki-sædýrasafninu í bænum Choshi, norðaustan við höfuðborgina Tokyo. Sérstaklega hefur verið einblínt á höfrunginn Honey, sem var skilinn eftir í lítilli laug á safninu. Myndir af höfrunginum sem teknar hafa verið síðustu mánuði sýna að aðstæður á safninu eru afar slæmar og er Honey talin sýna merki um streitu og vanlíðan.

Þá búa mörgæsir í garðinum einnig við þröngan kost, ef marka má mynd sem tekin var af lufsulegum fuglunum innan um steinsteypuklumpa.

Talið er að fyrrverandi starfsmenn sædýrasafnsins haldi lífi í dýrunum og gefi þeim að éta, þó að ekki sé ljóst hvaðan maturinn kemur. Þá hefur baráttufólki í samtökum um dýravelferð verið meinaður aðgangur á safnið síðustu mánuði.

Eins og áður sagði var sædýrasafninu lokað í janúar. Forsvarsmenn sögðu lokunina skrifast á dræma aðsókn í kjölfar náttúruhamfara í norðausturhluta Japan árið 2011.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.