Ian Wright: Ekkert annað í stöðunni en að Mourinho verði rekinn

Ian Wright, fyrrverandi landsliðsframherji Englands sem starfar sem sérfræðingur BBC í dag um fótbolta, sér ekkert annað í stöðunni en að José Mourinho verði látinn fara frá Manchester United ef ekkert breytist þar á bæ.

Portúgalinn og lærisveinar hans hafa fengið mikla gagnrýni fyrir 3-2 tap gegn Brighton um helgina en megn óánægja virðist vera á Old Trafford með ýmislegt, allt frá stjórnarformanninum til stuðningsmanna.

„Það eru vandamál á toppnum hjá Ed Woodward. Hann er óánægður, stjórinn er óánægður, leikmennirnir eru óánægðir og stuðningsmennirnir eru óánægðir. Eitthvað verður að láta undan á endanum,“ segir Wright í mikilli eldræðu um United sem má sjá hér að neðan.

„Ef þetta heldur áfram svona hjá Manchester United missir það alfarið af lestinni sama hversu mikinn pening félagið græðir. Ég sé ekkert annað í stöðunni en að José Mourinho missi starfið.“

„Stuðningsmenn liðsins eru byrjaðir að kalla eftir því að hann verði látinn fara. Hvernig er ekki hægt að reka hann ef ekkert breytist? Leikmennirnir virðast allavega ekki geta komist í gang,“ segir Ian Wright.