Erlent

Tengdaforeldrar Trump fá ríkisborgararétt þrátt fyrir gagnrýni hans

Kjartan Kjartansson skrifar
Knavs-hjónin eru orðin bandarískir ríkisborgarar en þau eru upprunin í Slóveníu.
Knavs-hjónin eru orðin bandarískir ríkisborgarar en þau eru upprunin í Slóveníu. Vísir/EPA

Amalija og Viktor Knavs, foreldrar Melaniu Trump, eiginkonu Bandaríkjaforseta, fengu bandarískan ríkisborgararétt í gær. Réttinn fengu þau í gegnum heimild í bandarískum útlendingalögum sem Trump forseti hefur ítrekað fundið flest til foráttu.

Svokallaður „keðjuinnflutningur“ (e. chain immigration) þar sem innflytjendur í Bandaríkjunum geta fengið landvistarleyfi fyrir fjölskyldu sína hefur verið Donald Trump Bandaríkjaforseta þyrnir í augum.

Hann hefur krafist þess að kerfið verði aflagt og þess í stað verði landvistarleyfi og ríkisborgararéttur veittur á grundvelli verðleika þannig að sérfræðingar komi frekar til landsins en fjölskyldur innflytjenda.

Forsetinn virðist þó ekki hafa sett sig upp á móti því að hans eigin tengdaforeldrar nýttu sér þessa heimild. Þau sóru ríkisborgaraeið við athöfn í New York í gær, að sögn breska ríkisútvarpsins BBC.

Lögmaður Knavs-hjónanna, sem eru upprunin í Slóveníu, segir að þau hafi fram að þessu búið í Bandaríkjunum á grænu korti sem þau gátu fengið vegna stöðu dóttur þeirra. Melania Trump hefur verið bandarískur ríkisborgari frá árinu 2006.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.