Richarlison tryggði tíu mönnum Everton stig

Richarlison skoraði tvö mörk í fyrsta leik sínum fyrir Everton í ensku úrvalsdeildinni í dag. Tíu menn Everton sóttu eitt stig gegn nýliðum Wolverhampton Wanderers.

Dagurinn byrjaði mjög vel fyrir gestina frá Everton. Nýi maðurinn Richarlison stimplaði sig inn með marki strax á 17. mínútu eftir aukaspyrnu Leighton Baines.

Allt leit út fyrir að Everton færi með þægilega 1-0 forystu inn í hálfleikinn þegar Phil Jagielka, einn reyndasti maður Everton, fór í tæklingu með takkana á lofti og var sýnt beint rautt spjald.

Ruben Neves, sem fór á kostum með Wolves síðasta vetur, tók aukaspyrnuna og gerði sér lítið fyrir og skoraði beint úr henni með laglegu skoti. Jordan Pickford náði að koma hendi í boltann en gat ekki haldið honum úti.

Everton lá nokkuð til baka í seinni hálfleik, enda manni færri. Gestirnir náðu þó skyndisókn á 67. mínútu og komust yfir með laglegu skoti frá Richarlison.

Neves vildi ekki láta frábært mark sitt fara forgörðum svo hann sendi boltann inn á teig Everton, fann kollinn á Raul Jimenez sem jafnaði leikinn á 80. mínútu.

Hvorugt lið náði að setja sigurmarkið inn og 2-2 jafntefli niðurstaðan í fyrsta leik liðanna í ensku úrvalsdeildinni þetta tímabilið.

Gylfi Þór Sigurðsson byrjaði leikinn á miðjunni hjá Everton. Hann var hins vegar tekinn af velli þegar Jagielka var rekinn út af og Marco Silva neyddist til þess að endurskipuleggja lið sitt.