Erlent

Trump segist tilbúinn að hitta forseta Írans

Kjartan Kjartansson skrifar
Trump sagðist tilbúinn að hitta hvern sem er með Guiseppe Conte, ítalska forsætisráðherrann, sér við hlið.
Trump sagðist tilbúinn að hitta hvern sem er með Guiseppe Conte, ítalska forsætisráðherrann, sér við hlið. Vísir/EPA

Donald Trump Bandaríkjaforseti segist reiðubúinn að hitta Hassan Rouhani, forseti Írans, hvenær sem hann vill og án nokkurra skilyrða. Grunnt hefur verið á því góða hjá Trump og Rouhani sem skiptust nýlega á hótunum á samfélagsmiðlum.

„Ef þeir vilja hittast þá hittumst við,“ sagði Trump þegar fréttamenn spurðu hann út í samskiptin við Íran á blaðamannafundi með Guiseppe Conte, forsætisráðherra Ítalíu, í Hvíta húsinu í dag.

„Ég myndi hitta hvern sem er. Ég trúi á fundi,“ sagði forsetinn jafnframt, að því er segir í frétt breska ríkisútvarpsins BBC.

Ríkisstjórn Trump undirbýr nú að legga viðskiptaþvinganir aftur á Íran eftir að hann ákvað að draga Bandaríkin út úr kjarnorkusamningi heimsveldanna við Írani.

Það var í síðustu viku sem Trump tísti í hástöfum og hótaði Rouhani að Íran myndi „þola afleiðingar sem fáir í sögunni hafa nokkru sinni upplifað áður“ ef íranski forsetinn hefði í hótunum við Bandaríkjamenn.

Rouhani hafði þá varað Trump við að efna til ófriðar við Íran.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.