Fótbolti

29 dagar í HM: Varamarkvörðurinn og vítabaninn sem varði Argentínu í úrslit

Henry Birgir Gunnarsson skrifar
Goycochea er hér að verja frá Donadoni í undanúrslitaleiknum.
Goycochea er hér að verja frá Donadoni í undanúrslitaleiknum. vísir/getty

Argentínski markvörðurinn Sergio Goycochea var vanur því að standa í skugganum en þegar hann fékk að stíga úr skugganum á HM árið 1990 þá blómstraði hann svo sannarlega. Hann átti ekki von á að spila á HM en kom heim sem þjóðhetja.

Goycochea var varamarkvörður fyrir Nery Pumpido hjá bæði River Plate og argentínska landsliðinu. HM 1990 átti því aðeins að vera fleiri gæðastundir á varamannabekknum. Hann var í raun þriðji markvörður landsliðsins en Luis Islas hætti við að spila á HM þar sem hann átti ekki að vera aðalmarkvörður.

Martröð Pumpido

Allt fór til fjandans hjá Pumpido á Ítalíu. Hann byrjaði á því að gefa mark gegn Kamerún í fyrsta leik og fótbrotnaði svo illa gegn Sovétríkjunum í öðrum leik Argentínu á mótinu. Þá var komið að Goycochea.

Það var bras á Argentínumönnum en hann sýndi snilldartilþrif í leiknum gegn Brasilíu, hélt búrinu hreinu og sá til þess að Argentína komst áfram í mótinu.

Í átta liða úrslitum mótsins mætti Argentína liði Júgóslavíu. Sá leikur fór í vítaspyrnukeppni. Í vítakeppninni klikkaði sjálfur Diego Maradona en það kom ekki að sök því Goycochea lokaði markinu og kom Argentínu í undanúrslit.

Sagði Maradona að slaka á

„Er ég mætti Diego eftir vítið þá sagði ég honum að slaka á. Ég myndi verja tvær spyrnur,“ sagði markvörðurinn.

Í undanúrslitunum biðu heimamenn frá Ítalíu. Aftur varð að grípa til vítaspyrnukeppni til að fá úrslit. Goycochea sýndi gegn Júggunum að hann var mikill vítabani og hann endurtók leikinn og varði Ítalí í úrslitaleikinn. Hann varði þá spyrnur frá Roberto Donadoni og Aldo Serena.

„Það sló þögn á alla á vellinum. Það var eins og einhver hefði lækkað hljóðið og aðeins heyrðist í liðsfélögum mínum. Mér leið eins og ég væri á litlum velli heima hjá mér,“ sagði Goycochea en leikurinn fór fram í Napoli. Á heimavelli Maradona.

Hann varði fjögur víti í þessum tveimur vítaspyrnukeppnum sem er HM-met. Harald Schumacher hefur líka varið fjögur víti en þurfti tvö HM til þess.

Úrslitaleikurinn gegn Vestur-Þýskalandi tapaðist 1-0 og það var nokkur kaldhæðni í því að eina mark leiksins var skorað af Andreas Brehme úr vítaspyrnu. Goycochea samt í réttu horni og ekki fjarri því að verja.

Þurfti að flýja á hótel

Þrátt fyrir það var Goycochea hampað mikið fyrir frammistöðu sína og markvarðarstaðan í landsliðinu var hans eftir þetta mót. Sjálfur sagði hann að honum hefði liðið eins og heimsmeistara eftir mótið. Skiljanlega.

Er heim var komið var hann eltur á röndum. Argentínumenn vildu knúsa hann og kyssa. Hann fékk ekki stundarfrið og varð að flýja á hótel með eiginkonunni til þess að svefnfrið. Alveg ný staða fyrir manninn sem var vanur því að vera í skugganum.

Þó svo hann hafi spilað í 20 ár þá náði hann samt aðeins að spila 226 leiki á ferlinum. Hann var það mikið á bekknum. Landsleikirnir urðu 44 en hann spilaði með landsliðinu í sjö ár.

Goycochea er 54 ára gamall í dag og starfar sem íþróttafréttamaður. Hann sér um þáttinn Elegante Sport í argentínska sjónvarpinu.


Tengdar fréttir

30 dagar í HM: Orustan um Santiago

Einn blóðugasti fótboltaleikur allra tíma fór fram í Síle 1962 þar sem einn heimamaður nefbraut meðal annars andstæðing sinn. Dómarinn sem dæmdi leikinn, Englendingurinn Ken Aston, varð síðar sá fyrsti til að láta sér detta í hug að nota gul og rauð spjöld í leikjum.

37 dagar í HM: Var eitrað fyrir Ronaldo á HM 1998?

Samsæriskenningarnar í kringum úrslitaleik Frakklands og Brasilíu á HM 1998 eru lyginni líkastar. Málið var svo stórt í Brasilíu að þingið stóð fyrir sinni eigin rannsókn á úrslitaleiknum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.