Innlent

Kalla eftir niðurstöðum velferðarráðuneytisins í máli Braga

Margrét Helga Erlingsdóttir skrifar
Þorsteinn Víglundsson segir að það sé mikilvægt að endurreisa traust á milli Barnaverndarstofu og viðkomandi Barnaverndarnefnda.
Þorsteinn Víglundsson segir að það sé mikilvægt að endurreisa traust á milli Barnaverndarstofu og viðkomandi Barnaverndarnefnda. Vísir/Samsett

Þorsteinn Víglundsson, þingmaður Viðreisnar, telur að næsta skrefið af hálfu þingsins sé að kalla eftir niðurstöðum athugunar velferðarráðuneytisins í máli Braga Guðbrandssonar, forstjóra Barnaverndarstofu. Að því loknu hljóti það að vera velferðarnefndar að meta hvort málið verði tekið fyrir.

Halldóra Mogensen, þingmaður Pírata og formaður velferðarnefndar segir að Ásmundur Einar Daðason, félags-og jafnréttismálaráðherra, komi fyrir nefndina á næstu dögum til þess að ræða barnaverndarmál. Hún hyggst þá einnig spyrja hann út í niðurstöðu ráðuneytisins – ef hún liggur yfir höfuð fyrir – og út í nýjustu vendingar í málinu.
 

Fyrrverandi félags-og jafnréttismálaráðherra segir að í ljósi alvarleika málsins geti núverandi félags-og jafnréttismálaráðherra ekki leynt niðurstöðum athugunar. Vísir/Ernir

Barnaverndarnefndir á höfuðborgarsvæðinu leituðu formlega til velferðarráðuneytisins í ráðherratíð Þorsteins Víglundssonar í nóvember á síðasta ári. Formenn nefndanna sendu formlegt bréf með umkvörtunum barnaverndarstarfsmanna á hendur Braga.

Í bréfunum var kvartað yfir starfsháttum Braga og hann sakaður um óeðlileg afskipti af einstökum málum. Á föstudag tilkynnti velferðarráðuneytið að Bragi væri útnefndur sem framboðsefni Íslands til Barnaréttarnefndar Sameinuðu þjóðanna þrátt fyrir ásakanir starfsfólks barnaverndarnefnda á höfuðborgarsvæðinu. 

Eðlileg stjórnsýsla að gera niðurstöðuna opinbera

„Þegar mál eru sett fram með þessum hætti, formleg kvörtun, er alveg ljóst að það er komin upp alvarleg staða. Það hefur verið lýst yfir trúnaðarbresti á milli Barnaverndarnefnda og Barnaverndarstofu. Þá á það að vera eðlilegur hluti af því að ljúka málinu að gera niðurstöðuna opinbera, fullkomlega í takt við eðlilegt gagnsæi í stjórnsýslu og það á ekki að vera með neinn feluleik með það,“ segir Þorsteinn.

Bragi Guðbrandsson, fráfarandi forstjóri Barnaverndarstofu sækist eftir kjöri til Barnaréttarnefndar Sameinuðu þjóðanna. vísir/valli

Hann vill taka skýrt fram að málið beinist ekki gegn persónu Braga heldur snúist það fyrst og fremst um eðlilega stjórnsýslu í viðkvæmum málaflokki eins og þessum.

„Þarna er kvartað yfir starfsháttum, með formlegum hætti, það var fjallað um það opinberlega að hverju þessar umkvartanir sneru. Að mínu viti, í stöðu minni sem ráðherra á þeim tíma, taldi ég þær það alvarlegar að það kallaði á mjög alvarlega athugun af hálfu ráðuneytisins á því hvað væri hæft í þessu og þegar mál eru komin í slíkan farveg er mjög eðlilegt að niðurstöður þeirra séu opinberar,“ segir Þorsteinn.

Þorsteinn segir að það sé afar mikilvægt að endurreisa traust og trúnað á milli Barnaverndarstofu og viðkomandi Barnaverndarnefnda sem höfðu í frammi umkvartanir. „Ég tel algjörlega augljóst að niðurstaða slíkrar athugunar eigi að vera opinber.“

Formaður velferðarnefndar vill fá allar upplýsingar upp á borð

Halldóra Mogensen, þingmaður Pírata og formaður velferðarnefndar, segir að það sé afar mikilvægt að allar upplýsingar í málinu séu aðgengilegur til þess að hægt sé að meta framhaldið. „Við, Píratar, viljum fá allar upplýsingar upp á borð.“

„Við eigum eftir að eiga okkar þingflokksfund í dag. Það var ekki talað um þetta sérstaklega á nefndarfundi í morgun,“ segir Halldóra sem segist ætla að eiga samtal við Ásmund Einar um vendingar í máli Braga þegar ráðherrann kemur fyrir nefndina á næstu dögum.

Halldóra Mogensen, þingmaður Pírata, segir að það sé afar mikilvægt að niðurstöður athugunar velferðarráðuneytisins séu gerðar opinberar. vísir/ernir

Spyr sig hvort Bragi njóti trausts

„Það er mjög óheppilegt ef ráðherra gefur út stuðningsyfirlýsingu þegar hann nýtur kannski ekki trausts. Maður spyr sig, nýtur hann trausts? Það er mjög flott hjá Þorsteini Víglundssyni að beina kastljósinu að þessu.“

Útnefning Braga gagnrýnd

Útnefning Braga hefur verið harðlega gagnrýnd. Í Silfrinu gærmorgun tjáði Þórhildur Sunna Ævarsdóttir, þingmaður Pírata, sig um málið og sagði að með útspilinu væri verið að verðlauna slæma hegðun. 

Þá ritaði Þorsteinn Víglundsson stöðuuppfærslu á Facebooksíðu sinni í gær þar sem hann gagnrýndi starfshætti núverandi ráðherra. Niðurstöður athugunar ráðuneytisins ættu að vera opinberar. 

Í gærkvöldi sendi ungliðahreyfing Vinstri hreyfingarinnar græns framboðs frá sér yfirlýsingu þar sem þess var krafist að ríkisstjórnin drægi stuðning sinn til baka.

Hvorki náðist í Ásmund Einar Daðason né Braga Guðbrandsson við vinnslu þessarar fréttar.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.