Viðskipti

Pöntun Emirates bjargaði smíði Airbus risaþotunnar

Kristján Már Unnarsson skrifar
Emirates er langstærsti flugrekandi A380 og fékk nýlega sína 100. þotu afhenta.
Emirates er langstærsti flugrekandi A380 og fékk nýlega sína 100. þotu afhenta. Mynd/Airbus.
Framleiðslu stærstu farþegaþotu heims, Airbus A380, var bjargað í dag þegar Emirates-flugfélagið pantaði allt að 36 eintök. Airbus hefði að öðrum kosti hætt smíði risaþotunnar vegna sölutregðu. Fjallað var um málið í fréttum Stöðvar 2 og sýndar myndir úr verksmiðjum Airbus í Toulouse í Frakklandi. 

Ekki eru nema tíu ár frá því Airbus A380 þotan var tekin í notkun. Þessi stærsta farþegaþota heims getur tekið allt að 850 farþega á tveimur hæðum en algengast er að hún sé innréttuð með um 500 sætum. Sem flaggskipi Airbus var henni ætlað að skáka júmbó-þotum Boeing og sýna umheiminum að evrópski flugvélaframleiðandinn væri kominn fram úr þeim bandaríska. 

Þróunarkostnaður vélarinnar varð hins vegar nærri þrefalt meiri en upphaflegar áætlanir gerðu ráð fyrir, tafir urðu á framleiðslu hennar, en það sem verra var: Þegar hún loksins var tilbúin höfðu flugfélög misst áhuga á að reka fjögurra hreyfla þotur þegar fram komu hagkvæmari tveggja hreyfla stórar breiðþotur.

Stjórnarformaður Emirates, Sjeik Ahmed bin Saeed Al Maktoum, og John Leahy, sölustjóri Airbus, undirrituðu samningana í höfuðstöðvum flugfélagsins í Dubai í morgun.Mynd/Airbus.
Af samtals 317 seldum þar til í dag höfðu 222 eintök verið afhent til 13 flugfélaga. Pantanir reyndust mun færri en Airbus hafði vonast til og síðustu tvö ár barst engin ný pöntun. Það stefndi því í að smíði þotunnar yrði hætt og staðfesti Airbus í síðustu viku að fyrirtækið ætti ekki annan kost en að loka framleiðslulínunni ef ekki seldust fleiri vélar. 

Í dag birtist svo bjargvætturinn í Sameinuðu arabísku furstadæmunum, Emirates-flugfélagið í Dubai, sem skrifaði undir skuldbindandi samninga um 20 þotur með valkosti um 16 aðrar til viðbótar. Samkvæmt verðlista kostar hvert eintak um 45 milljarða króna en samningurinn tryggir að risaþotan verður framleidd að minnsta kosti í tíu ár í viðbót. 

Hér má sjá frétt Stöðvar 2:


Tengdar fréttir

Risaþotan loksins komin í loftið

A380 risaþota frá samevrópsku flugvélasmiðjunni Airbus fór í loftið frá flugvelli í Toulouse í Frakklandi dag. Þetta var fyrsta tilraunaflug vélarinnar af fjórum í vikunni með áhöfn og farþega innanborðs. Flugið tekur sjö klukkustundir en farþegarnir, sem voru allir starfsmenn Airbus, munu gera prófanir á vélinni, sem er ein þeirra stærstu í heimi.

Tafir á afhendingu risaþota frá Airbus

Mörg af stærstu flugfélögum í heimi munu vera að endurskoða pantanir sínar á A380 risaþotum eftir að stjórn EADS, móðurfélags evrópska flugvélaframleiðandans Airbus, greindi frá því að afhending á risaþotunum myndi dragast fram á haustið 2007.






Fleiri fréttir

Sjá meira


×