Fimm hlutir sem þú vissir ekki um Sigmund Davíð

Lilja Katrín Gunnarsdóttir skrifar 20. desember 2017 21:00

Hin mörgu andlit Sigmundar. Vísir / Samsett mynd

Alþingismaðurinn Sigmundur Davíð Gunnlaugsson hefur setið á þingi um árabil og meðal annars gegnt embætti forsætisráðherra.

En það er ýmislegt sem fólk ef til vill veit ekki um Sigmund Davíð og því fór Lífið á stúfana og grúskaði í fortíð hans á léttum nótum.

David, Sigmundur og Tiger.Vísir / Samsett mynd

1. Jafn gamall og David Beckham og Tiger Woods

Sigmundur Davíð er fæddur í Reykjavík þann 12. mars árið 1975, sem þýðir að hann fagnar 43ja ára afmæli sínu á næsta ári.

Margt merkisfólk er fætt sama ár og Sigmundur Davíð. Fjölmiðlakonan Þóra Arnórsdóttir og pólitíkusinn Rósa Björk Brynjólfsdóttir eru báðar fæddar árið 1975, sem og Jónsi í Sigur Rós. Á erlendum vettvangi ber að nefna að bandarísku leikkonurnar Eva Longoria og Angelina Jolie eru einnig fæddar þetta herrans ár. Svo má ekki gleyma fótboltakappanum David Beckham og golfaranum Tiger Woods, sem báðir fæddust árið 1975.

Jón Ólafs kynþokkafyllstur.Vísir / Skjáskot af timarit.is

2. Tapaði fyrir tónlistarmanni

Sigmundur Davíð vermdi þriðja sætið í kosningu Rásar 2 um kynþokkafyllsta mann ársins 2004. Sigurvegari það árið var tónlistarmaðurinn Jón Ólafsson en í öðru sæti var Guðni Hauksson, sjómaður í Bolungarvík.

Í fjórða sæti hafnaði Idol-stjarnan Kalli Bjarni og í því fimmta var Ólafur Þór Rafnsson, byggingaverkfræðingur. Aðrir sem komust á topp tíu listann voru Vilhelm Anton Jónsson, Naglbítur, Guðjón Valur Sigurðsson, handboltamaður, Jónsi í Svörtum fötum, Sigfús Sigurðsson, handboltamaður og Idol-stjarnan Jón Sigurðsson.

Bless Ísland, hæ Oxford.Vísir / Skjáskot af timarit.is

3. Tekur ekki þátt í stjórnmálum

Það dró til tíðinda í lífi Sigmundar Davíðs í ágúst árið 2004 þegar hann fékk styrk frá breska utanríkisráðuneytinu til að stunda nám við Oxford-háskóla.

Í viðtali við DV sagðist Sigmundur vera spenntur fyrir skólavistinni. Aðspurður um tengingu sína við stjórnmál, í ljósi þess að hann væri sonur Framsóknarmannsins Gunnlaugs Sigmundssonar, sagði Sigmundur:

„Ég tek ekki þátt í stjórnmálum og hef aldrei tilheyrt stjórnmálaflokki.“

Sigmundur var kjörinn formaður Framsóknarflokksins tæpum fimm árum síðar, í janúar árið 2009.

Steggjun aldarinnar?Vísir / Skjáskot af timarit.is

4. Steggjaði Loga Bergmann

Sigmundur Davíð var einn þeirra sem steggjuðu sjónvarpsmanninn Loga Bergmann áður en hann kvæntist Svanhildi Hólm, aðstoðarkonu Bjarna Benediktssonar, árið 2005.

Samkvæmt frétt DV var mikið stuð á steggjunarhópnum, en ásamt Sigmundi voru það meðal annars Gísli Marteinn Baldursson, Ásgeir Kolbeinsson og Þorfinnur Ómarsson sem sáu um skipuleggja daginn fyrir Loga.

Mikil leynd var yfir steggjuninni en þó náðist að staðfesta að Logi hafi farið í listflug á þessum eftirminnilega degi.

Sigmundur á einlægum nótum.Vísir / Skjáskot af timarit.is

5. Kynntust í gamlárspartí

Sigmundur Davíð er kvæntur Önnu Sigurlaugu Pálsdóttur og eiga þau saman eina dóttur.

DV birti einlægt viðtal við Sigmund stuttu eftir að hann var kjörinn formaður Framsóknarflokksins árið 2009. Þá voru þau Anna Sigurlaug enn barnlaus en Sigmundur sagði þau finna fyrir pressu frá öðrum fjölskyldumeðlimum um að fjölga mannkyninu. Aðspurður hvernig hann hefði kynnst draumadísinni, sagði Sigmundur þá sögu frekar stutta en sæta.

„Það er í raun ekki mikið um það að segja, nema að við hittumst í áramótaboði, smullum vel saman og höfum verið saman síðan.“