Aron skoraði þrjú í tapi

Aron Pálmarsson skoraði þrjú mörk í tapi Barcelona fyrir Nantes í Meistaradeild Evrópu í handbolta í kvöld.

Heimamenn í Nantes tóku fljótt yfirhöndina í leiknum og voru með fjögurra marka forystu eftir tíu mínútna leik. Í hálfleik var staðan 16-11 fyrir Nantes.

Barcelona náði aldrei að vinna sig nær en í þriggja marka mun í seinni hálfleik og töpuðu að lokum með fjórum mörkum, 29-25.

Barcelona er jafnt Rhein-Neckar Löwen í þriðja sæti A-riðils, þremur stigum á eftir liði Nantes í öðru sætinu.