Viðskipti innlent

Stefán Karl vill lóð undir grænmetisgámaþorp

Haraldur Guðmundsson skrifar
Spretta hefur óskað eftir tímabundnum afnotum af lóðinni Strandgötu 86 í Hafnarfirði.
Spretta hefur óskað eftir tímabundnum afnotum af lóðinni Strandgötu 86 í Hafnarfirði. Vísir/Ernir
Sprotafyrirtækið Spretta, í eigu Stefáns Karls Stefánssonar leikara, hefur óskað eftir lóð við Strandgötu í Hafnarfirði undir gámaþorp og vill rækta þar sprettur (e. microgreens) og salat. Vill fyrirtækið gera þriggja til fimm ára samning og hefur Stefán Karl óskað eftir fundi með bæjaryfirvöldum sem allra fyrst.

Stefán Karl Stefánsson, leikari og eigandi Sprettu ehf.Vísir/andri
Forsvarsmenn Sprettu, þau Stefán Karl og Soffía Steingrímsdóttir, sendu Hafnarfjarðarhöfn bréf þann 7. nóvember og óskuðu eftir samstarfi vegna tilraunaverkefnisins.

Í því segjast þau vilja rækta spretturnar og innan tíðar salat í endurunnum frystigámum á lóðinni Strandgötu 86 fyrir veitingahús og almenning.

Lóðin sé á milli „gamla Slipphússins“ og „gamla Íshússins“ við höfnina og að þau telji hana geta hentað verkefninu um matvælaræktun í borg (e. urban farming) afar vel.

„Í gámaþorpi því sem við myndum vilja reisa við höfnina yrði gætt vandlega að útliti og aðkomu allri. Frágangur lóðar yrði á okkar ábyrgð og í fullri samvinnu við yfirvöld.“

„Þarna gæti orðið til vísir að matvælamarkaði í Hafnarfjarðarbæ þar sem hugsa mætti sér að um helgar væri hægt að nálgast hafnfirska matvöru og kaffisölu í hjarta bæjarins,“ segir í bréfinu og þar tekið fram að fyrirmyndir verkefnisins séu sóttar meðal annars til Bandaríkjanna og Bretlands.

Erindi Sprettu var tekið fyrir á fundi hafnarstjórnar síðasta föstudag og Lúðvík Geirssyni hafnarstjóra þá falið að ræða nánar við forráðamenn félagsins.

Lúðvík Geirsson, hafnarstjóri Hafnarfjarðar.
„Hafnarstjórnin hefur ekki tekið neina afstöðu og kallaði eftir frekari gögnum og upplýsingum. Þar er málið statt núna,“ segir Lúðvík í samtali við Fréttablaðið.

„Þetta er lóð sem höfnin á og er á mikilvægum stað hérna sem tengir saman miðbæjarsvæðið og höfnina og við höfum haldið eftir, því að bæði skipulag og nánari hugmyndavinna um framtíð svæðisins eru ófrágengin.“

„Við undirbúum nú opna samkeppni um allt þetta svæði sem fer í gang í byrjun nýs árs og á meðan erum við ekki að úthluta lóðinni en þarna er Spretta einungis að biðja um tímabundin afnot,“ segir Lúðvík.

Ekki náðist í Stefán Karl eða Soffíu Steingrímsdóttur þrátt fyrir ítrekaðar tilraunir. 






Fleiri fréttir

Sjá meira


×