Golf

McIlroy mun aldrei gleyma leiðindunum í Keane

Henry Birgir Gunnarsson skrifar
Rory kemur fram við aðdáendur sína af virðingu.
Rory kemur fram við aðdáendur sína af virðingu. vísir/getty

Kylfingurinn Rory McIlroy segir að hann muni aldrei gleyma deginum er knattspyrnumaðurinn Roy Keane neitaði að gefa honum eiginhandaráritun.

Þessir stælar í Keane er ástæðan fyrir því að McIlroy passar sig á því að valda aldrei aðdáendum sínum vonbrigðum er þeir vilja mynd eða áritun frá honum.

Norður-Írinn gladdi ungan dreng á Opna breska mótinu í síðustu viku er hann gaf honum golfboltann sinn. Þessu mun drengurinn líklega aldrei gleyma líkt og McIlroy gleymir aldrei svekkelsinu sínu með Keane.

„Ég hitti Keane á hóteli, labbaði til hans og bað um eiginhandaráritun. Hann sagði nei. Ég efast ekkert um að Keane sé ágætis náungi en þetta er samt reynsla sem ég gleymi aldrei,“ sagði McIlroy.

„Ég hef upplifað að fá þessa höfnun sem krakki og hætta að halda upp á viðkomandi í kjölfarið. Ef einhver krakki biður mig um áritun hef ég alltaf reynt að svara kallinu.“

McIlroy segist nota sex til níu bolta á hverjum hring og þegar hann þarf að skipta þá leitar hann að krakka í áhorfendaskaranum til þess að gefa boltann sem hann er hættur að nota.

„Ég var frekar hissa á því hvað var mikið gert úr þessu í síðustu viku. Það sýnir samt hvað svona lítill hlutur getur haft jákvæð áhrif á barn og viðkomandi barn vill svo kannski fara að æfa golf,“ sagði McIlroy en myndi hann gefa Keane sína áritun ef hann bæði um hana?

„Bara ef ég fengi hans á móti.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira