Enski boltinn

Clough hélt Pearce á jörðinni eftir landsleik: „Lagaðu straujárnið annars verður þú á bekknum“

Tómas Þór Þórðarson skrifar
Brian Clough elskaði Stuart Pearce.
Brian Clough elskaði Stuart Pearce. vísir/getty
Brian Clough, fyrrverandi knattspyrnustjóri Derby og Nottingham Forest, var engum líkur. Hann er af flestum talinn sá besti sem aldrei þjálfaði enska landsliðið en Clough gerði Forest að Evrópumeistara tvö ár í röð árin 1979 og 1980.

Clough var með einstakan stíl og var elskaður af fjölmiðlamönnum sem og leikmönnum sínum en Dean Saunders, fyrrverandi landsliðsmaður Wales, sagði geggjaða sögu af Clough í útvarpsþætti Jim White á talkSPORT í gærkvöldi.

Sagan snerist um það hvernig Clough hélt Stuart Pearce, fyrrverandi leikmanni Forest og enska landsliðsins, á jörðinni eftir að hann kom hress og kátur úr leik með enska landsliðinu. Hana má heyra í heild sinni hér neðst í fréttinni.

Pearce spilaði með Englandi á þriðjudagskvöldi og þurfti ekki að mæta aftur til æfinga hjá Forest fyrr en síðdegis á fimmtudegi. Þegar hann sat svo inn í búningsklefanum með félögum sínum kom Clough inn með poka sem hann lagði á gólfið en í pokanum var augljóslega eitthvað þungt.

Brian Clough með aðstoðarmanni sínum til margra ára, Peter Taylor.vísir/getty
„Clough spurði Pearce hvernig hann taldi sig hafa staðið sig með enska liðinu og Pearce var nokkuð ánægður með sína frammistöðu. Clough fannst það ekki. Honum fannst Pearce hafa staðið sig skelfilega,“ segir Saunders.

Clough hélt svo áfram, í léttum tóni vitaskuld, og sagði við aðra leikmenn Forest að Pearce, fyrirliði liðsins, væri loddari. Hann hafði séð auglýsingu fyrir raftækjabúð Stuart Pearce í leikskránni í síðasta leik.

Pearce úrskýrði að fjölskylda hans hefði lengi átt þessa raftækjabúð og þegar hann var sjálfur að spila í utandeildinni reyndi hann að halda fyrirtækinu á floti.

„Fyrirliðinn okkar er loddari,“ sagði Clogh og Pearce spurði á móti hvað hann ætti við. „Ef Barbara, konan mín, hringir í þetta númer ef ljósapera fer heima hjá okkur verður það þú sem svarar?“

José Mourinho og Brian Clough eru líkir segir sonur Cloughs, Nigel.vísir/getty
Pearce var augljóslega ekki að vinna í raftækjabúð samhliða því að vera fyrirliði úrvalsdeildarliðs og landsliðsmaður Englands og útskýrði því að bróðir hans væri að sjá um búðina.

„Þá ertu loddari. Í auglýsingunni segir að þú komir,“ sagði Clough og gekk að Pearce með pokann þunga. Í honum var straujárn sem hann rétti fyrirliðanum.

„Straujárnið hennar Barböru minnar er bilað. Lagaðu það fyrir laugardaginn annars verður þú á bekknum,“ sagði Clough og gekk út úr klefanum.

Stuart Pearce tók engar áhættur með hvort Clough væri að grínast eða ekki þannig að hann lagaði straujárnið og lagði það á skrifborð stjórans á laugardagsmorguninn svo hann væri örugglega í liðinu.

Þessa bráðskemmtilegu sögu má heyra hér að neðan.


Tengdar fréttir




Fleiri fréttir

Sjá meira


×