Innlent

Ögrandi skilaboð skrifuð í mosa við Nesjavelli

Margrét Helga Erlingsdóttir og Kristín Ólafsdóttir skrifar
Mynd Gunnars sýnir skemmdarverkin á mosanum.
Mynd Gunnars sýnir skemmdarverkin á mosanum. Gunnar Arngrímur Birgisson

„Ég vona að þetta vekji fólk til umhugsunar,“ segir Gunnar Arngrímur Birgisson sem vakti athygli á skemmdarverkum sem óprúttnir aðilar hafa unnið á mosa í hlíð við Nesjavelli. Í hlíðinni má greina skilaboð sem greypt hafa verið í mosann á borð við „send nudes“ og „life“ svo einhver séu nefnd.

Gunnar starfar innan ferðaþjónustugeirans en vegna vinnu sinnar keyrir hann reglulega framhjá þessari hlíð. Hann segir að skemmdarverkin séu ekki nýtilkomin því hann hafi tekið eftir þeim um nokkra hríð.

„Þetta er búið að vera á nokkrum stöðum og ég hef tekið eftir því að það er alltaf að bætast þarna í og í fyrra bættist við þarna „life“ og svo núna um daginn hefur einhver skrifað „send nudes“,“ segir Gunnar sem lýsir því hvernig hann hafi lengi viljað gera eitthvað til þess að sporna gegn þessari meinlegu þróun. 

Sérfræðingar í spjallþræði búa yfir mögulegum lausnum
Gunnar tók því til sinna ráða og birti mynd af hlíðinni í Fésbókarhópnum Bakland ferðaþjónustunnar en hópnum er ætlað að „opna augu almennings og ríkisvaldsins fyrir mikilvægi ferðaþjónustu í íslensku samfélagi,“ eins og segir í lýsingu á hópnum. 

Þá vilja hópmeðlimir fjalla um stóru myndina, landkynningarmál og það sem lýtur að rekstrarumhverfi fyrirtækja í greininni. Við mynd Gunnars spannst lífleg umræða en greina mátti á henni að fjölmargir vilja leggja hönd á plóg við að vernda náttúruna.

Spurður að því hvort hægt sé að lagfæra skemmdarverkin í ljósi þess að mosi vex svo hægt segist Gunnar ekki vera þess fullviss. Hann bendir þó á að nokkrir einstaklingar, sem reynslu hafa í þessum málum, segjast á spjallþræði við myndina kunna kúnstir til úrbóta. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.