Innlent

Almannatengslafyrirtæki hóf undirbúning útskýringar Ólafs fyrir hálfu ári

Jóhann Óli Eiðsson skrifar
Lénið soluferli.is var keypt fjórum mánuðum áður en rannsóknarnefnd Alþingis skilaði af sér.
Lénið soluferli.is var keypt fjórum mánuðum áður en rannsóknarnefnd Alþingis skilaði af sér. vísir/vilhelm

Kynning Ólafs Ólafssonar, fjárfestis sem yfirleitt er kenndur við Samskip, á aðkomu sinni á einkavæðingu Búnaðarbankans hefur verið í vinnslu í tæplega hálft ár. Þetta má sjá við skoðun á heimasíðu um söluferlið, soluferli.is. Heimasíðan er skráð á almannatengslafyrirtækið KOM.

Í lok marsmánaðar, nánar tiltekið þann 29. mars síðastliðinn, kynnti rannsóknarnefnd Alþingis niðurstöðu rannsóknar sinnar. Þar kom fram að þýski bankinn Hauck & Aufhäser, Kaupþing á Íslandi og í Lúxemborg auk hóps manna sem vann fyrir og í þágu Ólafs Ólafssonar notuðu leynilega samninga til að fela raunverulegt eignarhald þess hlutar sem þýski bankinn átti í orði kveðnu.

Rannsóknarnefnd Alþingis í málinu var komið á fót með þingsályktunartillögu í júní í fyrra. Í kjölfarið hóf hún að afla gagna í tengslum við málið auk þess sem hún neytti heimildar til að taka skýrslur af einstaklingum.

Mættu ekki í skýrslutökur

Fjórir einstaklingar, Ólafur Ólafsson, fyrrverandi stjórnarformaður Eglu hf., Guðmundur Hjaltason, fyrrverandi framkvæmdastjóri sama félags, Sigurður Einarsson, fyrrverandi forstjóri Kaupþings hf. og Hreiðar Már Sigurðsson, fyrrverandi aðstoðarforstjóri sama fyrirtækis mættu ekki til boðaðar skýrslutöku á vegum nefndarinnar. Af þeim sökum beindi nefndin erindi til héraðsdóms, dagsettu 22. nóvember 2016, að skýrsla yrði tekin af aðilunum.

Þann 23. nóvember var kveðinn upp úrskurður um hæfi héraðsdómara til að taka málið fyrir en sá úrskurður var staðfestur í Hæstarétti fimm dögum síðar. Í millitíðinni var lénið soluferli.is keypt.

Á skráningarskírteini lénsins af vef ISNIC má sjá að þann 25. nóvember 2016 keypti almannatengslafyrirtækið KOM lénið. Netfang rétthafa er fridjon@kom.is en þar ræðir um Friðjón Friðjónsson einn eigenda fyrirtækisins. Í desember á síðasta ári var hafist handa við að birta efni á síðunni.


Tengdar fréttir

Almannatengill mættur í innanríkisráðuneytið

Fjölmiðlar bíða enn átekta utan við innanríkisráðuneytið og vonast til þess að ná tali af Hönnu Birnu Kristjánsdóttur, fyrrverandi innanríkisráðherra, þegar hún yfirgefur bygginguna.

Friðjón aðstoðar Bjarna Ben

Friðjón R. Friðjónsson tekur í dag tímabundið við starfi aðstoðarmanns Bjarna Benediktssonar formanns Sjálfstæðisflokksins. Sigurður Kári Kristjánsson var aðstoðarmaður Bjarna Benediktsson þar til hann tók sæti á þingi í apríl síðastliðnum. Það gerði hann þegar að Illugi Gunnarsson, þingmaður Sjálftæðisflokksins, tók sér leyfi frá þingstörfum á meðan sérstakur saksóknari skoðar hvort tilefni sé til að taka málefni sem snúa að peningamarkaðssjóðum bankanna til rannsóknar. Illugi var í stjórn Sjóðs 9 hjá Glitni.




Fleiri fréttir

Sjá meira