Innlent

Setur upp sýningu á gamla berklahælinu

Sæunn Gísladóttir skrifar
María Pálsdóttir segir að stefnt sé að opnun í maí 2018 á Kristnesi.
María Pálsdóttir segir að stefnt sé að opnun í maí 2018 á Kristnesi. vísir/ernir

„Þetta er þannig að ég ætla að opna í maí 2018 setur um sögu berklanna, annars vegar sýningu og hins vegar kaffihús sem verður í anda fjórða áratugar síðustu aldar. Þetta verður á Kristnesi sem er dásamlegur staður, tíu kílómetra sunnan við Akureyri. Þar var annað berklahæli landsins reist árið 1927,“ segir María Pálsdóttir, leikkona og frumkvöðull.

„Þetta eru æskustöðvarnar mínar. Hugmyndin kviknaði þegar ég var að rölta þarna um og sá hvernig hlutirnir voru aðeins að drabbast niður. Ég ákvað að gera eitthvað í málunum,“ segir María.

Hún segir sögu berklana einstaklega merkilega og er hún búin að sökkva sér ofan í hana síðastliðið árið. „Þetta er stórmerkilegur tími og svakalegur sjúkdómur sem geisaði hérna snemma á 20. öldinni. Engin lyf voru til fyrr en upp úr miðri öldinni. Fólk var tekið og sett í einangrun, margir voru ungir og vissu ekki hvort þeir næðu þrítugs aldri,“ segir María.

Sjúklingur á Kristneshæli á síðustu öld. Mynd/Aðsend

Sýningin mun vera upplifunartengd. „Ég vil hafa þetta meira eins og leikhús, að fólk gangi inn í einhvern heim. Það verða sjónrænar lausnir, myndir, myndupptökur, og hljóðheimur. Markmiðið er að fræða fólk um þennan sjúkdóm og segja þessar persónulegu sögur sem eru margar magnaðar,“ segir María.

Hún hefur stofnað Facebook-síðu í kringum setrið og biðlar til fólks sem hefur áhugaverða sögu að segja af ættingjum með berkla, eða á ljósmyndir eða muni frá berklatímanum, að hika ekki við að senda skilaboð. „Mér eru endalaust að berast ábendingar og það er dásamlegt, þetta tengist eiginlega inn í allar fjölskyldur landsins.“

María tekur þátt í viðskiptahraðlinum Startup Tourism um þessar mundir, en þeim tíu vikna hraðli lýkur í lok mánaðarins. Hún segir það mjög gott að hafa aðgang að öðrum í sömu sporum, sem og leiðbeinendunum sem koma að hraðlinum. „Við erum öll með margar sömu spurningarnar og svipuð vandamál til að leysa. Ég er búin að hitta fullt af frábæru fólki sem er búið að hjálpa mér.“

María leitar nú eftir fjárfestum inn í verkefnið en þann 28. apríl stendur Startup Tourism að opnum fjárfestadegi þar sem hægt verður að hlusta á kynningar allra teymanna.

María Pálsdóttir að setja sig í spor hjúkrunarkonu frá tímabilinu. Mynd/Aðsend


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.