Erlent

Á fjórða tug flóttamanna lét lífið í árás úr þyrlu í Jemen

Atli Ísleifsson skrifar
Ófremdarástand hefur ríkt í Jemen síðustu ár.
Ófremdarástand hefur ríkt í Jemen síðustu ár. Vísir/AFP

Að minnsta kosti 31 sómalskur flóttamaður lét lífið þegar ráðist var á bát þeirra úr þyrlu undan strönd Jemen í gærkvöldi.

Maður í áhöfn bátsins segir að tekist hafi að bjarga áttatíu flóttamönnum um borð.

Sameinuðu þjóðirnar hafa staðfest að 31 flóttamaður hafi látið lífið í árásinni, en fólkið hafði verið skráð sem flóttamenn af starfsmönnum Flóttamannastofnunar Sameinuðu þjóðanna.

Flóttamennirnir voru á leið frá Jemen til Súdan en ráðist var á bátinn úr Apacheþyrlu nærri sundinu Bab al-Mandab sem tengir Aden-flóa við Rauðahaf.

Ekki er vitað hverjir bera ábyrgð á árásinni.

Ófremdarástand hefur ríkt í Jemen síðustu ár þar sem uppreisnarmenn Húta, sem njóta stuðnings Írana, hafa átt í átökum við stjórnarherinn, sem aftur á móti nýtur stuðnings Sádi-Araba.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira