Viðskipti erlent

Twitter þaggar niður í þeim sem áreita

Þórgnýr Einar Albertsson skrifar
Twitter þaggar niður í þeim sem fyrirtækið telur áreita aðra.
Twitter þaggar niður í þeim sem fyrirtækið telur áreita aðra. Nordicphotos/AFP

Samskiptamiðillinn Twitter kemur nú í veg fyrir að tíst þeirra notenda sem Twitter telur áreita aðra notendur komist á flug. Er það gert með því að koma í veg fyrir að notendur sem ekki fylgja umræddum áreitandi notendum sjái tíst þeirra síðarnefndu.

Skiptir þar engu máli hvort þeim tístum hafi verið endurtíst (e. re­tweeted). Tíst þar sem notandi sem hefur verið refsað minnist á annan notanda sjást ekki heldur.

Notendur sem refsað hefur verið deildu í gær skjáskotum af tölvupósti sem þeir fengu frá Twitter um stefnubreytinguna. „Til þess að skapa öruggara umhverfi og tryggja frjálsa tjáningu notenda okkar höfum við ákveðið að takmarka aðgang þinn. Við höfum tekið eftir áreiti af þinni hálfu, þannig að eingöngu þeir sem fylgja þér munu sjá tíst þín í þann tíma sem tiltekinn er hér fyrir neðan,“ segir í tölvupósti til notanda sem þurfti að sæta refsingunni í tólf klukkustundir.

Í tísti sínu um refsinguna sagði sá notandi að honum væri refsað fyrir að nota enska orðið „retard“ sem er niðrandi orð um fólk með þroskahömlun.

Fjölmiðlar á borð við The Drudge Report, sem er á íhaldssamari væng stjórnmálanna, héldu því fram að Twitter væri með þessu að takmarka tjáningarfrelsi bandarískra íhaldsmanna. 

Fréttin birtist fyrst í Fréttablaðinu



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira