Körfuboltakvöld: Sett í Túrbógírinn

Þórir Guðmundur Þorbjarnarson, leikmaður KR, er ekki kallaður Tóti Túrbó að ástæðulausu.

Þessi 18 ára strákur sýndi enn og aftur hvers hann er megnugur þegar KR vann þægilegan sigur á Þór Ak., 97-86, í 6. umferð Domino's deildar karla á fimmtudaginn.

Þórir byrjaði á bekknum en kom inn á og skilaði 20 stigum, þremur fráköstum og fjórum stolnum boltum. Þá hitti hann úr sjö af tólf skotum sínum utan af velli í leiknum.

„Hann er rosalega góður að fara á körfuna og er rosalega hæfileikaríkur sóknarmaður,“ sagði Hermann Hauksson um Þóri í Domino's Körfuboltakvöldi í fyrradag.

„Hann þvingar aldrei neinu. Hann tekur skot þegar hann er opinn og ef menn komandi hlaupandi í hann fer hann framhjá þeim. Það er svo gaman að horfa á hann,“ sagði Kjartan Atli Kjartansson um þennan efnilega leikmann sem er alltaf að fá stærra og stærra hlutverk í KR-liðinu.

Innslagið í heild sinni má sjá í spilaranum hér að ofan.