Handbolti

Aron og félagar sóttu tvö stig til Þýskalands | Róbert komst ekki á blað

Kristinn Páll Teitsson skrifar
Aron í leik með Veszprém.
Aron í leik með Veszprém. Vísir/EPA

Aron Pálmarsson og félagar í Veszprém sóttu tvö stig til Þýskalands í 29-28 sigri á Flensburg í dag en með sigrinum heldur ungverska liðið í við PSG á toppi A-riðilsins í Meistaradeild Evrópu.

Heimamenn í Flensburg byrjuðu leikinn betur og leiddu verðskuldað í hálfleik 12-10 en leikmenn Veszprém komu mun einbeittari til leiks í seinni hálfleik.

Náði Veszprém þegar mest var þriggja marka forskoti í seinni hálfleik en Flensburg var aldrei langt undan og náði að minnka muninn aftur niður í eitt mark.

Lengra komst þýska félagið ekki og fögnuðu leikmenn Veszprém því sigrinum af krafti en Veszprém er með 21 stig að 13 leikjum loknum í A-riðli, stigi minna en PSG.

Aron náði sér ekki nægilega vel á strik í leiknum í dag og lauk leik með aðeins eitt mark en markmenn Flensburg náðu oft að verja vel frá honum.

Róbert Gunnarsson var á leikskýrslu hjá PSG í 27-22 sigri á Wisla Plock í Póllandi en Róberti tókst ekki að komast á blað í leiknum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira