Handbolti

Svíar gerðu sitt en þurfa að bíða til kvölds

Eiríkur Stefán Ásgeirsson skrifar
Jonas Källman í leiknum í dag.
Jonas Källman í leiknum í dag. Vísir/Getty

Svíþjóð vann öruggan sigur á Ungverjalandi, 22-14, á Evrópumeistaramótinu í Póllandi í dag og er þar með í sterkri stöðu fyrir forkeppni Ólympíuleikanna.

Svíar munu tryggja sér sæti í forkeppninni ef að Rússum mistekst að vinna Spánverja í kvöld, en Spánn verður þá að spila um sæti í undanúrslitum keppninnar.

Svíþjóð hafði þriggja marka forystu í hálfleik, 10-7, en náði að stinga af í síðari hálfleik. Munurinn var orðinn níu mörk, 17-8, eftir tíu mínútur í síðari hálfleik og úrslitin í raun ráðin.

Lukas Nilsson og Viktor Östlund skoruðu fimm mörk hvor fyrir Svía í leiknum en markahæstur hjá Ungverjalandi var Richard Bodo með fimm mörk. Mattias Andersson átti stórleik í marki Svía og varði 17 skot - 55 prósent þeirra skota sem hann fékk á sig í leiknum.

Svíþjóð er í fjórða sæti milliriðls 2 með fjögur stig en Ungverjar eru án stiga í riðlinum. Rússar eru með þrjú stig en eiga leik til góða gegn Spáni í kvöld sem fyrr segir.

Í milliriðli 1 mættust botnliðin Makedónía og Hvíta-Rússland, þar sem síðarnefnda liðið hafði nauman sigur, 30-29. Hvít-Rússar enduðu með tvö stig í riðlinum en Makedónía eitt.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira