Enski boltinn

Kaup United á Felipe Anderson sett á ís því Lazio neitar að borga honum bónus

Tómas Þór Þórðarson skrifar
Felipe Anderson vill fá það sem honum var lofað.
Felipe Anderson vill fá það sem honum var lofað. vísir/getty

Þrjátíu og fimm milljóna punda kaup Manchester United á Brasilíumanninum Felipe Anderson frá Lazio hafa verið sett á ís í bili.

Þessi 22 ára gamli leikmaður er efstur á kauplista United í janáurmánuði en Ed Woodward, stjórnarformaður félagsins, fór til Rómar í desember til að ganga frá kaupum á leikmanninum.

Hann er aftur á móti ekkert að drífa sig frá Lazio því hann vill fá bónusgreiðslu sem félagið skuldar honum, en hún er hluti af riftunarverði hans.

Fótboltavefurinn Goal.com greinir frá því að riftunarverð Andersons sé 35 milljónir punda getur Lazio því ekki hafnað tilboði Manchester United.

Aftur á móti er ákvæði í samningi Brassans sem segir að hann eigi að fá prósentu af riftunarverðinu sé eitthvað lið tilbúið að kaupa hann fyrir þessa upphæð.

Lazio virðist ekki vera tilbúið til að borga Anderson þennan bónus og ætlar hann því að bíða með að taka ákvörðun um hvort hann fari til Manchester United.

Anderson, sem getur spilað á báðum vængjum, er búinn að skora fjögur mörk og gefa tvær stoðsendingar fyrir Lazio í ítölsku A-deildinni á tímabilinu.

Hann hefur ekki skorað eða lagt upp mark síðan í lok október og var skipt af velli í hálfleik gegn Carpi í gær eftir daprar 45 mínútur.




Fleiri fréttir

Sjá meira